(ហ្កាហ្សា)៖ មន្ត្រីសុខាភិបាលហ្កាហ្សាបានរាយការណ៍ថា មនុស្សយ៉ាងតិច ១៥នាក់ ក្នុងនោះរួមមានអ្នកសារព័ត៌មានអន្តរជាតិចំនួន ៤នាក់ ត្រូវបានសម្លាប់នៅក្នុងការវាយប្រហាររបស់អ៉ីស្រាអែលទៅលើមន្ទីរពេទ្យ Nasser ដែលជាមន្ទីរពេទ្យធំជាងគេនៅភាគខាងត្បូងតំបន់ហ្កាហ្សា។ នេះបើយោងតាមការចេញផ្សាយ ដោយសារព័ត៌មាន Reuters។

យោងតាមក្រុមការពារជនស៊ីវិលដែលគ្រប់គ្រងដោយក្រុមហាម៉ាស ការវាយប្រហារលើកទីមួយបានសម្លាប់មនុស្សមួយចំនួន ហើយការវាយប្រហារលើកទីពីរបានកើតឡើងនៅពេលដែលក្រុមអ្នកជួយសង្គ្រោះ និងអ្នកសារព័ត៌មានបានប្រញាប់ប្រញាល់ទៅដល់កន្លែងកើតហេតុ។ ក្នុងចំណោមអ្នកស្លាប់រួមមាន អ្នកថតរូបរបស់ទីភ្នាក់ងារ Reuters, អ្នកសារព័ត៌មាន Associated Press (AP), អ្នកសារព័ត៌មានរបស់ Al Jazeera និងអ្នកថតរូបម្នាក់ទៀតផងដែរ។

វីដេអូពីកន្លែងកើតហេតុបានបង្ហាញពីទិដ្ឋភាពដ៏រន្ធត់ នៅពេលដែលការផ្ទុះលើកទីពីរបានកើតឡើង ខណៈដែលគ្រូពេទ្យ និងអ្នកសារព័ត៌មានកំពុងស្ថិតនៅក្បែរនោះ បណ្តាលឱ្យមានភាពចលាចលយ៉ាងខ្លាំង។ ជាការឆ្លើយតប យោធាអ៉ីស្រាអែលបានបញ្ជាក់ថា ខ្លួនពិតជាបានធ្វើការវាយប្រហារលើមន្ទីរពេទ្យនេះមែន ហើយការស៊ើបអង្កេតមួយត្រូវបានបញ្ជាឱ្យធ្វើឡើង ប៉ុន្តែបានបន្ថែមថា ខ្លួន «មិនបានកំណត់គោលដៅលើអ្នកសារព័ត៌មានជាពិសេសនោះទេ»។

គួរបញ្ជាក់ថា ការវាយប្រហារនេះកើតឡើងតែពីរសប្តាហ៍ប៉ុណ្ណោះ បន្ទាប់ពីអ្នកសារព័ត៌មាន ៦នាក់ផ្សេងទៀត ត្រូវបានសម្លាប់នៅក្នុងការវាយប្រហាររបស់អ៉ីស្រាអែលនៅក្បែរមន្ទីរពេទ្យ al-Shifa។ ការិយាល័យសិទ្ធិមនុស្សរបស់ UN បានថ្កោលទោសការវាយប្រហារនោះ ដោយចាត់ទុកថាជាការរំលោភបំពានយ៉ាងធ្ងន់ធ្ងរលើច្បាប់អន្តរជាតិ៕