(កៀវ)៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានប្រកាសនៅថ្ងៃចន្ទនេះថា ទីក្រុងកៀវមានគោលបំណងកៀរគរប្រមូលថវិកាពីសម្ព័ន្ធមិត្ត យ៉ាងហោចណាស់ ១ពាន់លានដុល្លារក្នុងមួយខែ ដើម្បីទិញសព្វាវុធរបស់សហរដ្ឋអាមេរិក សម្រាប់កិច្ចខិតខំប្រឹងប្រែងសង្គ្រាមប្រឆាំងនឹងរុស្ស៊ី។ នេះបើយោងតាមការចេញផ្សាយ ដោយទីភ្នាក់ងារសារព័ត៌មាន Reuters។

ការប្រកាសនេះត្រូវបានធ្វើឡើង នៅក្នុងសន្និសីទសារព័ត៌មានរួមគ្នាមួយនៅទីក្រុងកៀវ ជាមួយនាយករដ្ឋមន្ត្រីន័រវែស លោក Jonas Gahr Store។ នៅក្នុងឱកាសនោះ លោក ហ្សេលេនស្គី ក៏បានលើកឡើងផងដែរថា ប្រទេសន័រវែសអាចរួមចំណែកក្នុងការធានាសន្តិសុខសម្រាប់អ៊ុយក្រែន ជាពិសេសក្នុងវិស័យការពារដែនអាកាស និងសន្តិសុខដែនសមុទ្រ៕