(វ៉ាស៊ីនតោន)៖ ប្រធានាធិបតីកូរ៉េខាងត្បូង លោក Lee Jae Myung នៅថ្ងៃចន្ទ ទី២៥ ខែសីហា បាននិយាយថាកូរ៉េខាងជើងក្នុងពេលឆាប់ៗនេះអាចផលិតក្បាលគ្រាប់នុយក្លេអ៊ែរពី១០ ទៅ២០គ្រាប់ ក្នុងមួយឆ្នាំ ខណៈរូបលោកអំពាវនាវឱ្យមានកិច្ចប្រឹងប្រែងបន្ធូរបន្ថយភាពតានតឹង។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

តាមវិទ្យាស្ថានស្រាវជ្រាវសន្តិភាពអន្តរជាតិ Stockholm (Stockholm International Peace Research Institute) កូរ៉េខាងជើង បច្ចុប្បន្នមានក្បាលគ្រាប់នុយក្លេអ៊ែរប្រហែលជា ៥០គ្រាប់ ហើយមានសមត្ថភាពផលិតបន្ថែម ៤០គ្រាប់ទៀត។ ថ្លែងនៅឯមជ្ឈមណ្ឌលសម្រាប់យុទ្ធសាស្ត្រ និងការសិក្សាអន្តរជាតិ នាឱកាសបំពេញទស្សនកិច្ចក្នុងទីក្រុងវ៉ាស៊ីនតោន និងក្រោយជំនួបជាមួយលោកប្រធានាធិបតីអាមេរិក ដូណាល់ ត្រាំ លោក Lee Jae Myung បានគូសបញ្ជាក់ ដូច្នេះថា «មីស៊ីល ICBM មួយប្រភេទដែលមានសមត្ថភាពបាញ់ដល់សហរដ្ឋអាមេរិកជិតត្រូវបានអភិវឌ្ឍទាំងស្រុង ហើយពួកគេ (កូរ៉េខាងជើង) នឹងកំពុងបន្តកសាងសមត្ថភាពដើម្បីផលិតក្បាលគ្រាប់នុយក្លេអ៊ែរពី១០ ទៅ២០គ្រាប់ក្នុងមួយឆ្នាំ»។

ដោយលើកឡើងពីចន្លោះប្រហោងនៃគោលនយោបាយរបស់អតីតប្រធានាធិបតីកូរ៉េខាងត្បូង លោក Yoon Suk Yeol និងកង្វះខាតការទូតជាមួយកូរ៉េខាងជើង លោក Lee បានបន្ថែមថា «យើងបានប្រឹងប្រែងដើម្បីកំញើញកូរ៉េខាងជើង និងអនុវត្តការដាក់ទណ្ឌកម្ម។ តែជាលទ្ធផល កូរ៉េខាងជើងនៅតែបន្តអភិវឌ្ឍកម្មវិធីនុយក្លេអ៊ែរ របស់ខ្លួន...ហើយការពិត នោះគឺចំនួនអាវុធនុយក្លេអ៊ែរដែលកូរ៉េខាងជើងកំពុងកាន់កាប់បានកើនឡើង ក្នុងរយៈពេលពី៣ ទៅ៤ឆ្នាំចុងក្រោយនេះ»។

បើតាមលោក Lee កូរ៉េខាងត្បូងបានប្ដេជ្ញាចិត្តក្នុងការអភិវឌ្ឍអាវុធទូទៅមិនមែននុយក្លេអ៊ែរ ដើម្បីកំញើញកូរ៉េខាងជើង ប៉ុន្តែលោកក៏បានសង្កត់ធ្ងន់ផងដែរពីកិច្ចប្រឹងប្រែង របស់លោកក្នុងការបន្ធូរបន្ថយភាពតានតឹង ដូចជាការដកឧបករណ៍បំពងសំឡេងរិះគន់ទីក្រុងព្យុងយ៉ាងចេញពីតំបន់ព្រំដែន៕