(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ បានបដិសេធថារូបលោកមិនមែនជាមេដឹកនាំផ្ដាច់ការនោះទេ ប៉ុន្តែព្រមពេលជាមួយគ្នា លោកបានព្រលយថា ប្រជាជនអាមេរិកជាច្រើនប្រហែលជាចង់បានមេដឹកនាំផ្ដាច់ការម្នាក់ ខណៈរូបលោកចុះហត្ថលេខាលើបទបញ្ជារឹតបន្តឹងការគ្រប់គ្រងលើរដ្ឋធានីវ៉ាស៊ីនតោន និងកាត់ទោសអ្នកដុត បំផ្លាញទង់ជាតិអាមេរិក។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

ថ្លែងប្រាប់ក្រុមអ្នកសារព័ត៌មាន នៅឯការិយាល័យពងក្រពើកាលពីថ្ងៃចន្ទ ទី២៥ ខែសីហា លោក ត្រាំ បានរិះគន់ក្រុមអ្នកប្រឆាំងនឹងរូបលោក និងប្រព័ន្ធផ្សព្វផ្សាយ ហើយថា លោកមិនមែនកំពុងចង់ចង់ល្បីដោយសារតែការដាក់ពង្រាយកងទ័ពឆ្មាំជាតិដើម្បីបង្ក្រាបឧក្រិដ្ឋកម្ម និងអន្តោប្រវេសន៍នោះឡើយ។ លោក ត្រាំ បានគូសបញ្ជាក់ដូច្នេះថា «ពួកគេ បាននិយាយថា យើងមិនត្រូវគាត់ទេ (លោក ត្រាំ)។ សេរីភាព សេរីភាព។ គាត់គឺជាមេដឹកនាំផ្ដាច់ការ។ គាត់គឺជាមេដឹកនាំផ្ដាច់ការ។ តែមនុស្សជាច្រើននិយាយថា យើងប្រហែលជាអាចនឹងចូលចិត្តមេដឹកនាំផ្ដាច់ការម្នាក់»។

យ៉ាងណាក៏ដោយ លោក ត្រាំបានអះអាងថារូបលោកមិនចូលចិត្តមេដឹកនាំផ្ដាច់នោះទេ។ «ខ្ញុំមិនចូលចិត្តមេដឹកនាំផ្ដាច់ការទេ ហើយខ្ញុំក៏មិនមែនជាមេដឹកនាំផ្ដាច់នោះដែរ។ ខ្ញុំជាមនុស្សម្នាក់ដែលមានហេតុផល និងជាមនុស្សឆ្លាតម្នាក់»។

គួរបញ្ជាក់ថា លោក ត្រាំ ក៏ធ្លាប់បាននិយាយនៅមុនជាប់ឆ្នោតជាប្រធានាធិបតីអាមេរិកសម្រាប់អាណត្តិកាលពីខែវិច្ឆិកា ឆ្នាំ២០២៤ដែរថារូបលោកអាចនឹងក្លាយជា មេដឹកនាំផ្ដាច់ការម្នាក់នៅថ្ងៃណាមួយ។ កាលពីដើមខែសីហានេះ លោក ត្រាំ បានដាក់ពង្រាយកងទ័ពឆ្មាំជាតិទៅកាន់រដ្ឋធានីវ៉ាស៊ីនតោន ដើម្បីបង្ក្រាបអ្វីដែលលោកបានហៅថា ការកើនឡើងឧក្រិដ្ឋកម្ម ជាមួយការគ្រប់គ្រងលើស្ថាប័នប៉ូលិសនៃរដ្ឋធានីវ៉ាស៊ីនតោនតែម្ដង៕