(សិង្ហបុរី)៖ នៅថ្ងៃអង្គារ ទី២៦ ខែសីហា បុរសម្នាក់ដែលផលិតបារីអេឡិចត្រូនិក (vape) ផ្ទុកសារធាតុ etomidate ដោយមានចេតនាយកទៅលក់ ត្រូវបានតុលាការកាត់ទោសឱ្យជាប់ពន្ធនាគារ រយៈពេល ១៦ខែ ដែលជាករណីផ្តន្ទាទោសលើកដំបូង ចាប់តាំងពីការប្រកាសចាត់ទុកបារីអេឡិកត្រូនិក ជាបញ្ហាគ្រឿងញៀន។ នេះបើយោងតាមការចេញផ្សាយដោយទីភ្នាក់ងារសារព័ត៌មាន CNA។

បុរសឈ្មោះ Mohammed Akil Abdul Rahim ជនជាតិសិង្ហបុរី អាយុ ៤១ឆ្នាំ បានសារភាពកំហុស ចំពោះបទចោទប្រកាន់ចំនួន ៣ពាក់ព័ន្ធនឹងបារីអេឡិកត្រូនិក សារធាតុផ្សំ និងការផ្តល់ព័ត៌មានមិនពិត នៅក្នុងពាក្យសុំលិខិតឆ្លងដែន។ ដោយឡែក ករណីទី ៤ ត្រូវបានយកទៅពិចារណាបន្ត។ ចៅក្រមរងស្រុក លោកស្រី Ong Chin Rhu និយាយថា ការសិក្សាថ្មីធ្វើឡើងដោយអាជ្ញាធរវិទ្យាសាស្ត្រសុខាភិបាល បង្ហាញថាប្រហែលមួយភាគបីនៃគំរូ vapes ដែលរឹបអូសពីសាធារណៈជនសុទ្ធតែមានសារធាតុ etomidate ដែលត្រូវទប់ស្កាត់។ លោកស្រីបន្ថែមថា Mohammed Akil មិនមែនគ្រាន់តែជាអ្នកលក់ vapes ប៉ុណ្ណោះទេ ប៉ុន្តែក៏បានចូលរួមយ៉ាងសកម្ម ក្នុងការកែច្នៃ ឬវេចខ្ចប់ឧបករណ៍សម្រាប់ជក់ផងដែរ។

គួរបញ្ជាក់ថា ថ្មីៗនេះ ប្រទេសសិង្ហបុរី បានចាត់ទុកការជក់បារីអេឡិចត្រូនិក ជាបញ្ហាគ្រឿងញៀន ហើយថានឹងបង្កើនការអនុវត្តច្បាប់ ដែលកំពុងរីករាលដាលកាន់តែខ្លាំងឡើង ក្នុងចំណោមយុវជននៅក្នុងប្រទេស៕