(ប៉េកាំង)៖ នាថ្ងៃអង្គារ ទី២៦ ខែសីហា ប្រធានាធិបតីចិន លោក ស៉ី ជីនពីង បាននិយាយថា ចិននិងរុស្ស៉ីគួរតែរួបរួមសាមគ្គីគ្នា ថែរក្សាការពារជាតិផលប្រយោជន៍សន្តិសុខ និងការអភិវឌ្ឍរបស់ពួកគេ ក្នុងកិច្ចប្រឹងប្រែងកសាងសណ្តាប់ធ្នាប់អន្តរជាតិមួយ ដែលមានសមធម៌ជាងមុន។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

លោក ស៉ី បានលើកឡើងដូចខាងលើ ប្រាប់ទៅកាន់ប្រធានរដ្ឋសភានៃប្រទេសរុស្ស៉ី លោក Vyacheslav Volodin ដែលបានមកដល់ប្រទេសចិន កាលពីថ្ងៃចន្ទសប្តាហ៍នេះ ដើម្បីបំពេញទស្សនកិច្ច។ លោកប្រធានាធិបតីចិន បានបន្តថា រុស្ស៉ីនិងចិន គួរតែបង្រួបបង្រួមបណ្តាប្រទេសនានា នៃក្រុមលោកខាងត្បូង ខណៈទំនាក់ទំនងចិន-រុស្ស៉ី បម្រើជាប្រភពមួយនៃស្ថិរភាពសម្រាប់​សុខសន្តិភាពពិភពលោក។

គួរបញ្ជាក់ថា វត្តមានរបស់លោក Volodin នៅចិន គឺមុនពេលដំណើរទស្សនកិច្ចរបស់ប្រធានាធិបតីរុស្ស៉ី លោក វ៉្លាឌីមៀ ពូទីន មកកាន់ប្រទេសចិននាចុងសប្តាហ៍នេះ ដើម្បីចូលរួមកិច្ចប្រជុំនៃអង្គការសហប្រតិបត្តិការសៀងហៃ (SCO) ជាមួយបណ្តាមេដឹកនាំ​នៃក្រុមប្រទេសលោកខាងត្បូង ដែលរួមមានទាំងនាយករដ្ឋមន្រ្តីឥណ្ឌា លោក Narendra Modi។ មិនតែប៉ុណ្ណោះ លោក ពូទីន ក៏ត្រូវបានរំពឹងថា នឹងជាភ្ញៀវកិត្តិយសបរទេសសំខាន់ជាងគេផងដែរ ក្នុងពិធីព្យុហយាត្រាយោធាធំមួយនៅទីក្រុងប៉េកាំង នាសប្តាហ៍ក្រោយ ដើម្បីអបអរខួបជ័យជម្នះសង្រ្គាមលោកលើកទី២៕