(កង់បេរ៉ា)៖ នៅថ្ងៃអង្គារ ទី២៦ ខែសីហា រដ្ឋាភិបាលអូស្រ្តាលីបានប្រកាសថា ខ្លួនសម្រេចបណ្តេញឯកអគ្គរដ្ឋទូតអ៉ីរ៉ង់ចេញពីប្រទេស ក្រោមការចោទប្រកាន់ថា អ៉ីរ៉ង់គឺជាអ្នកនៅពីក្រោយករណីវាយប្រហាររើសអើងប្រឆាំងជនជាតិជ្វីហ្វ នៅឯទីក្រុង Melbourne និងទីក្រុង Sydney។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

នាយករដ្ឋមន្រ្តីអូស្រ្តាលី លោក Anthony Albanese បាននិយាយថា បណ្តាញស៉ើបការណ៍សម្ងាត់ បានឈានដល់ការសន្និដ្ឋានថា អ៉ីរ៉ង់គឺជាអ្នកដែលបានដឹកនាំ ការវាយប្រហារប្រឆាំងជនជាតិជ្វីហ្វយ៉ាងហោច២ករណី កាលពីពេលកន្លងទៅ។ ក្នុងនោះ មួយករណីគឺ​ការវាយប្រហារដោយដុតហាងកាហ្វេមួយកន្លែង នៅជាយទីក្រុង Sydney កាលពីខែតុលា ឆ្នាំ២០២៤ និងមួយករណីទៀត គឺករណីដុតព្រះវិហារជី្វហ្វ នៅទីក្រុង Melbourne កាលពីខែធ្នូ ឆ្នាំដដែល។ មិនមានមនុស្សរងគ្រោះថ្នាក់ ក្នុងករណីទាំង២នោះទេ។

ទោះជាបែបនេះក្តី លោក Albanese បានប្រកាសចាត់ទុកឯកអគ្គរដ្ឋទូតអ៉ីរ៉ង់ លោក Ahmad Sadeghi ជាបុគ្គលដែលលែងត្រូវបានស្វាគមន៍ ហើយបង្គាប់ឱ្យរូបលោក ព្រមទាំងមន្រ្តីទូតអ៉ីរ៉ង់៣នាក់ទៀត ចាកចេញពីប្រទេសអូស្រ្តាលី ក្នុងរយៈពេល៧ថ្ងៃ។ បើតាមលោក Albanese អូស្រ្តាលីបានកោះហៅអគ្គរាជទូតរបស់ខ្លួនប្រចាំនៅអ៉ីរ៉ង់ត្រឡប់មកវិញ ហើយផ្អាកប្រតិបត្តិការរបស់ស្ថានទូតជាបណ្តោះអាសន្ន នៅទីក្រុងតេហេរ៉ង់។

គួរបញ្ជាក់ថា វាគឺជាលើកដំបូងបំផុតដែលអូស្រ្តាលី បានបណ្តេញឯកអគ្គរដ្ឋ-រាជទូតបរទេសចេញពីប្រទេសរបស់ខ្លួន គិតតាំងពី​សង្រ្គាមលោកលើកទី២មក។ អូស្រ្តាលីមានស្ថានទូតប្រចាំនៅទីក្រុងតេហរ៉ង់ ចាប់តាំងពីឆ្នាំ១៩៦៨៕