(ញូវយ៉ក)៖ អ្នកថតរូបជនជាតិកាណាដា លោកស្រី Valerie Zink បានប្រកាសលាលែងពីតំណែងពីទីភ្នាក់ងារ Reuters បន្ទាប់ពីបានបម្រើការងារឱ្យស្ថាប័នសារព័ត៌មានយក្សមួយនេះ អស់រយៈពេល ៨ឆ្នាំ ដោយចោទប្រកាន់ធ្ងន់ៗថា បាន «ក្បត់វិជ្ជាជីវៈ» និង​ «បង្កលក្ខខណ្ឌ» ឱ្យមានការសម្លាប់អ្នកសារព័ត៌មាននៅតំបន់ហ្កាហ្សា។ នេះបើយោងតាមការចុះផ្សាយដោយ សារព័ត៌មានអន្តរជាតិផ្សេងៗ។

នៅក្នុងសំណេរលើបណ្តាញសង្គម X លោកស្រី Zink បានបញ្ជាក់ថា លោកស្រីមិនអាចបន្តធ្វើការឱ្យ Reuters បានទៀតទេ ដោយសារតែតួនាទីរបស់ស្ថាប័ននេះ​ បាន «ផ្តល់ភាពស្របច្បាប់» ឱ្យមានការធ្វើឃាតអ្នកសារព័ត៌មាន។ លោកស្រីបានលើកឡើងពីករណីរបស់អ្នកកាសែត Anas Al-Sharif ដោយចោទប្រកាន់ Reuters ថាបានផ្សព្វផ្សាយបន្តនូវ «ការអះអាងដែលគ្មានមូលដ្ឋាន» របស់អ៉ីស្រាអែលថា លោកគឺជាសកម្មជនរបស់ក្រុមហាម៉ាស។

ទន្ទឹមគ្នានេះ លោកស្រីបានចាត់ទុកការវាយប្រហារលើមន្ទីរពេទ្យ Nasser ដែលបានសម្លាប់មិត្តរួមការងាររបស់លោកស្រីផ្ទាល់ ថាជាយុទ្ធសាស្ត្រ «double tap» ដ៏ឃោរឃៅ ដែលក្នុងនោះអ៉ីស្រាអែលបានវាយប្រហារគោលដៅស៊ីវិល រង់ចាំក្រុមអ្នកជួយសង្គ្រោះ និងអ្នកសារព័ត៌មានទៅដល់ រួចហើយក៏វាយប្រហារម្តងទៀត។

គួរបញ្ជាក់ថា ការលាលែងពីតំណែងនេះ កើតឡើងស្របពេលដែលចំនួនអ្នកសារព័ត៌មានប៉ាឡេស្ទីនដែលត្រូវបានសម្លាប់ដោយអ៉ីស្រាអែលបានកើនឡើងដល់ ២៤៦នាក់៕