(ចាការតា)៖ សភាឥណ្ឌូណេស៊ី នៅថ្ងៃអង្គារនេះ បានអនុម័តឲ្យមានការបង្កើតក្រសួងថ្មីមួយ ដែលផ្តោតជាពិសេសលើការគ្រប់គ្រងធម្មយាត្រា Hajj និង Umrah ដោយនឹងទទួលបន្ទុកសេវាកម្មសម្រាប់ប្រជាជនឥណ្ឌូណេស៊ីរាប់លាននាក់ ដែលធ្វើដំណើរទៅកាន់ប្រទេសអារ៉ាប៊ីសាអូឌីតជារៀងរាល់ឆ្នាំ។ នេះបើយោងតាមការចេញផ្សាយ សារព័ត៌មាន Arab News។

សមាជិកសភា លោក Marwan Dasopang បានមានប្រសាសន៍ថា «ក្រសួងនេះនឹងផ្តល់នូវសេវាកម្មច្រកចេញចូលតែមួយ និងសម្របសម្រួលរាល់បញ្ហាទាំងអស់ដែលពាក់ព័ន្ធនឹងការរៀបចំធម្មយាត្រា Hajj និង Umrah»។ លោកបានបន្ថែមថា សេវាកម្មធម្មយាត្រានៅឥណ្ឌូណេស៊ី ពីមុនត្រូវបានរៀបចំដោយអគ្គនាយកដ្ឋានគ្រប់គ្រង Hajj និង Umrah ដែលស្ថិតនៅក្រោមក្រសួងសាសនា។

គួរបញ្ជាក់ថា ឥណ្ឌូណេស៊ី ដែលជាប្រទេសមានប្រជាជនមូស្លីមច្រើនជាងគេបំផុតនៅលើពិភពលោក បញ្ជូនចំនួនអ្នកធម្មយាត្រា Hajj ច្រើនជាងគេបំផុតជារៀងរាល់ឆ្នាំ។ ជាក់ស្តែង កាលពីដើមឆ្នាំនេះ អ្នកធម្មយាត្រា Hajj ជនជាតិឥណ្ឌូណេស៊ីចំនួន ២២១,០០០នាក់ ស្ថិតក្នុងចំណោមជនមូស្លីមជាង ១.៦លាននាក់ ដែលបានធ្វើដំណើរទៅកាន់ទីក្រុង Makkah។

អនុប្រធានសភា លោក Cucun Ahmad Syamsurijal បានថ្លែងថា «យើងសង្ឃឹមថា ជាមួយនឹងក្រសួងថ្មីនេះ សេវាកម្មសម្រាប់អ្នកធម្មយាត្រានឹងត្រូវបានកែលម្អបន្ថែមទៀត»។ ប្រធានាធិបតី លោក Prabowo Subianto ត្រូវបានគេរំពឹងថានឹងតែងតាំងរដ្ឋមន្ត្រីដើម្បីដឹកនាំក្រសួងថ្មីនេះក្នុងពេលឆាប់ៗខាងមុខ៕