(កៀវ)៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី នៅថ្ងៃអង្គារ ទី២៦ ខែសីហា បាននិយាយថាប្រទេសតួកគី បណ្ដាប្រទេសអារ៉ាប់ក្នុងតំបន់ឈូងសមុទ្រពែក្ស ឬបណ្ដាអឺរ៉ុប អាចរៀបចំកិច្ចចរចាដោយផ្ទាល់រវាងលោក និងប្រធានាធិបតីរុស្ស៉ី វ្ល៉ាឌីមៀ ពូទីន ដើម្បីជួយដល់ការបិទបញ្ចប់សង្រ្គាមនៅអ៊ុយក្រែន។ នេះបើតាមការចេញផ្សាយដោយទីភ្នាក់ងារសារព័ត៌មាន​ Reuters។

រដ្ឋមន្ត្រីការបរទេសរុស្ស៉ី លោក Sergei Lavrov បាននិយាយថាមិនទាន់មានរបៀបវារៈត្រូវបានរៀបចំនៅឡើយទេសម្រាប់ជំនួបរវាងលោក ពូទីន និងលោក ហ្សេលេនស្គី។ ក្នុងសុន្ទរកថាវីដេអូមួយកាលពីយប់ថ្ងៃអង្គារ លោក ហ្សេលេនស្គី បានគូសបញ្ជាក់ដូច្នេះថា «ឥលូវ ក្នុងសប្ដាហ៍នេះនឹងមានការទំនាក់ទំនងជាមួយតួកគី បណ្ដាប្រទេសអារ៉ាប់ក្នុងតំបន់ ឈូងសមុទ្រពែក្ស និងបណ្ដាប្រទេសអឺរ៉ុបដែលសុទ្ធសឹងតែអាចរៀបចំកិច្ចចរចាជាមួយរុស្ស៉ី»។ លោកបន្ថែមថាអ៊ុយក្រែនកំពុងត្រៀមលក្ខណៈជាអតិបរមាសំដៅបិទបញ្ចប់សង្រ្គាម។

គួរបញ្ជាក់ថា ការលើកឡើងខាងលើរបស់លោក ហ្សេលេនស្គី កើតមានឡើងចំពេលនាយខុទ្ទការល័យរបស់លោក គឺលោក Andriy Yermak និងប្រមុខក្រុមប្រឹក្សាសន្តិសុខជាតិ អ៊ុយក្រែនកំពុងស្ថិតក្នុងប្រទេសកាតា ដើម្បីជួបជាមួយរដ្ឋមន្ត្រីការពារជាតិកាតា៕