(សេអ៊ូល)៖ ប្រព័ន្ធផ្សព្វផ្សាយរដ្ឋកូរ៉េខាងជើង KCNA នៅថ្ងៃពុធ ទី២៧ ខែសីហា បានរិះគន់ប្រធានាធិបតីកូរ៉េខាងត្បូង លោក Lee Jae Myung ថាជាមនុស្សលាក់ពុត សម្រាប់ការអត្ថាធិប្បាយរបស់ ពាក់ព័ន្ធនឹងការរំសាយអាវុធនុយក្លេអ៊ែរនៅលើឧបទ្វីបកូរ៉េ អំឡុងទស្សនកិច្ចនៅសហរដ្ឋអាមេរិកក្នុងសប្ដាហ៍នេះ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ថ្លែងនៅឯមជ្ឈមណ្ឌល់សម្រាប់យុទ្ធសាស្ត្រ និងការសិក្សាអន្តរជាតិក្នុងទីក្រុងវ៉ាស៊ីនតោន កាលពីថ្ងៃចន្ទដើមសប្ដាហ៍កន្លងទៅនេះ លោក Lee Jae Myung បានលើកឡើងថា សម្ព័ន្ធភាពរវាងកូរ៉េខាងត្បូង និងសហរដ្ឋអាមេរិកនឹងត្រូវបានធ្វើបច្ចុប្បន្នភាពដល់កម្រិតពិភពលោកលើសពីតំបន់ឧបទ្វីបកូរ៉េ នៅពេលដែលមានជំហានមួយសម្រាប់ការរំសាយអាវុធនុយក្លេអ៊ែរ សន្តិភាព និងការរួមរស់នៅលើឧបទ្វីបកូរ៉េ។

ជាការឆ្លើយតបទៅនឹងការលើកឡើងរបស់លោក Lee KCNA បាននិយាយថាលោក Lee កំពុងបង្ហាញឱ្យគេឃើញថារូបលោកមានឆន្ទៈស្ដារទំនាក់ទំនងឡើងវិញរវាងកូរ៉េទាំង២ ប៉ុន្តែធាតុពិតបានបង្ហាញថា ខ្លួនគាត់ (លោក Lee) គឺជាមនុស្សងប់នឹងការប្រឈមមុខដាក់គ្នា និងលាក់ពុត។

គួរបញ្ជាក់ថា KCNA មិនបានលើកឡើងពីប្រធានាធិបតីអាមេរិក លោក ដូណាល់ ត្រាំ ឬក៏ការលើកឡើងរបស់លោក ត្រាំ ថារូបលោកចង់ជួបលោក គីម ជុងអ៊ុនសាជាថ្មីនោះទេ។ ក្នុងជំនួបជាមួយលោក Lee កាលពីថ្ងៃចន្ទ លោក ត្រាំ បាននិយាយថារូបលោកចង់ជួបលោក គីម ជុងអ៊ុនសាជាថ្មីក្នុងឆ្នាំនេះ៕