(កៀវ)៖ នាយករដ្ឋមន្រ្តីអ៊ុយក្រែន លោកស្រី Yulia Svyrydenko បាននិយាយថា បុរសអាយុចន្លោះពី ១៨ឆ្នាំទៅ ២២ឆ្នាំ ឥឡូវនេះ ត្រូវបានអនុញ្ញាតឱ្យឆ្លងព្រំដែនដោយសេរី ទោះជាប្រទេសកំពុងស្ថិតក្រោមច្បាប់អាជ្ញាសឹក។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃពុធ ទី២៧ ខែសីហា ឆ្នាំ ២០២៥។

លោកស្រី Svyrydenko បានឱ្យដឹងតាមបណ្តាញតេឡេក្រាមថា បទប្បញ្ញត្តិស្តីពីការឆ្លងព្រំដែនពីមុន ត្រូវបានរដ្ឋាភិបាលទម្លាក់ចោល ហើយអ្នកស្ថិតក្នុងក្រុមអាយុពាក់ព័ន្ធ នឹងអាចធ្វើដំណើរទៅក្រៅប្រទេសបានធម្មតា។ លោកស្រី Svyrydenko បន្ថែមថា ការសម្រេចថ្មីនេះ ក៏នឹងអនុវត្តចំពោះពលរដ្ឋទាំងអស់ ដែលចង់ធ្វើដំណើរទៅក្រៅប្រទេស ក្រោមហេតុផលផ្សេងៗផងដែរ។

គួរបញ្ជាក់ថា កាលពីមុន បទប្បញ្ញត្តិដែលត្រូវបានដាក់ចេញ ក្រោយផ្ទុះសង្រ្គាមឈ្លានពានរបស់រុស្ស៉ី នៅខែកុម្ភៈឆ្នាំ ២០២២ បានរារាំងបុរសអាយុពី ១៨ឆ្នាំដល់ ៦០ឆ្នាំ មិនឱ្យចាកចេញពីប្រទេស៕