(វ៉ាស៉ីនតោន)៖ កាលពីថ្ងៃអង្គារ ទី២៦ ខែសីហា ប៉ូលិសនៅសហរដ្ឋអាមេរិក បានឱ្យដឹងថា បុរសម្នាក់ត្រូវបានចាប់ខ្លួននៅក្បែរសេតវិមាន បន្ទាប់ពីដុតទង់ជាតិអាមេរិក ដើម្បីសម្តែងការតវ៉ា ចំពោះបទបញ្ជាប្រតិបត្តិ​របស់ប្រធានាធិបតីលោក ដូណាល់ ត្រាំ ដែលកំណត់គោលដៅលើទង្វើបែបនោះ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

ការចាប់ខ្លួនខាងលើកើតមានឡើង បន្ទាប់ពីក្នុងសប្តាហ៍នេះ លោក ដូណាល់ ត្រាំ បានចេញបញ្ជាបង្គាប់ឱ្យក្រសួងយុត្តិធម៌អាមេរិក ចាត់វិធានការច្បាប់ប្រឆាំង ជនទាំងឡាយណាដែលហ៊ានដុតទង់ជាតិ បើទោះបីជាសេចក្តីសម្រេចយូរមកហើយរបស់តុលាការកំពូល បានចែងថា សកម្មភាពដុតទង់ជាតិអាមេរិក គឺត្រូវបានការពារដោយរដ្ឋធម្មនុញ្ញ ក៏ដោយ។ ប៉ូលិសអាមេរិក បានបកស្រាយថា ការចាប់ខ្លួន​ជននោះ ដោយសារការដុតភ្លើងដោយគ្មានការអនុញ្ញាត នៅតាមសួនច្បារសាធារណៈ គឺត្រូវបានហាមឃាត់។ ហេតុការណ៍នោះ បានកើតឡើងនៅសួន Lafayette ក្បែរសេតវិមាន។

គួរបញ្ជាក់ថា ក្នុងសេចក្តីសម្រេចជាប្រវត្តិសាស្រ្តកាលពីឆ្នាំ១៩៨៩ តុលាការកំពូលអាមេរិក បានកំណត់ថា ការដុតទង់ជាតិអាមេរិក គឺត្រូវបានការពារដោយវិសោធនកម្មទី១ នៃរដ្ឋធម្មនុញ្ញរបស់សហរដ្ឋអាមេរិក ពោលគឺសេចក្តីសម្រេចពេលនោះ បានលុបចោលទាំងអស់ នូវការហាមឃាត់ប្រឆាំងទង្វើដុតទង់ជាតិអាមេរិក។ យ៉ាងណាមិញ កាលពីថ្ងៃចន្ទសប្តាហ៍នេះ លោក ត្រាំ បានលើកឡើងថា គួរតែអាចមានករណីលើកលែងមួយចំនួន នៅក្នុងការការពារនោះ ហើយលោកបានបង្គាប់ឱ្យក្រសួងយុត្តិធម៌ ផ្តោតអាទិភាពអនុវត្តឱ្យតឹងរ៉ឹងបំផុតតាមតែអាចទៅរួច នូវច្បាប់នានាដែលពាក់ព័ន្ធការដុតទង់ជាតិ៕