(វ៉ាស៉ីនតោន)៖ ការយកពន្ធកើនដល់៥០ភាគរយរបស់សហរដ្ឋអាមេរិក លើទំនិញនាំចូលពីប្រទេសឥណ្ឌា បានចូលជាធរមាន នាថ្ងៃពុធ ទី២៧ ខែសីហា ខណៈវាគឺជាការដំឡើងអត្រាពន្ធគុណនឹងពីរ ខណៈដែលប្រធានាធិបតីអាមេរិក លោក ដូណាល់ ត្រាំ ចង់ដាក់ពិន័យលើ​ទីក្រុងញូវដែលី សម្រាប់ការបន្តទិញប្រេងពីរុស្ស៉ី។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

កន្លងមកនេះ លោក ដូណាល់ ត្រាំ បានបង្កើនសម្ពាធជាខ្លាំងលើឥណ្ឌា ជុំវិញការទិញប្រេងពីប្រទេសរុស្ស៉ី ដែលជាប្រភពចំណូលដ៏សំខាន់ សម្រាប់សង្រ្គាមរបស់ទីក្រុងមូស្គូនៅអ៊ុយក្រែន ហើយវាគឺជាផ្នែកមួយនៃកិច្ចប្រឹងប្រែងរបស់លោកប្រធានាធិបតីអាមេរិក ក្នុងការស្វែងរកទីបញ្ចប់សម្រាប់ជម្លោះនេះ។ ស្របពេលដែល​លោក ត្រាំ បានដំឡើងពន្ធទាំងលើសម្ព័ន្ធមិត្ត និងគូប្រជែង ចាប់តាំងពីត្រឡប់មកកាន់អំណាចសាជាថ្មី កាលពីខែមករា ដើមឆ្នាំ អត្រាពន្ធ៥០ភាគរយនេះ គឺជាកម្រិតដ៏ខ្ពស់បំផុតមួយ ដែលដៃគូពាណិជ្ជកម្មអាមេរិក ត្រូវទទួលរង។

គួរបញ្ជាក់ថា សហរដ្ឋអាមេរិក គឺជាគោលដៅនាំចេញលំដាប់ទី១របស់ឥណ្ឌា កាលពីឆ្នាំ២០២៤ ជាមួយទំនិញគិតជាទឹកប្រាក់ ៨៧.៣ពាន់លានដុល្លារ បានចូលទៅកាន់អាមេរិក។ ដោយឡែក ពាក់ព័ន្ធនឹងរឿងទិញប្រេងវិញ រុស្ស៉ីរ៉ាប់រងជិត៣៦ភាគរយ នៃប្រេងឆៅសរុបដែលឥណ្ឌានាំចូលប្រទេសរបស់ខ្លួន កាលពីឆ្នាំ២០២៤។ ការទិញប្រេងពីរុស្ស៉ី បានជួយឥណ្ឌាសន្សំសំចៃថវិកា​រាប់ពាន់លានដុល្លារលើថ្លៃនាំចូល ហើយជួយរក្សាតម្លៃប្រេងក្នុងស្រុករបស់ឥណ្ឌា ឱ្យមានស្ថិរភាព។ ការធ្លាក់ចុះនៃចំណងទាក់ទងរវាងអាមេរិកនិងឥណ្ឌា ក៏ទំនងជានឹងលើកទឹកចិត្ត ឱ្យទីក្រុងញូវដែលី ងាកទៅពង្រឹងទំនាក់ទំនងបន្ថែមទៀត ជាមួយ​ទីក្រុងប៉េកាំង ដែលជាគូប្រជែងរបស់អាមេរិក ផងដែរ៕