(វ៉ាស៉ីនតោន)៖ បេសកជនពិសេសអាមេរិក លោក Steve Witkoff បានឱ្យដឹងថា ប្រធានាធិបតី លោក ដូណាល់ ត្រាំ នឹងធ្វើជាប្រធានកិច្ចប្រជុំស្តីពីហ្កាហ្សា នៅសេតវិមាន នាថ្ងៃពុធនេះ ហើយទីក្រុងវ៉ាស៉ីនតោនរំពឹងថា សង្រ្គាមរបស់អ៉ីស្រាអែលលើដែនដីប៉ាឡេស្ទីន នឹងអាចដោះស្រាយនៅចុងឆ្នាំនេះ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។

លោក Witkoff បានប្រាប់ Fox News ថា «យើងមានកិច្ចប្រជុំដ៏ធំមួយនៅសេតវិមាន ដែលដឹកនាំដោយលោកប្រធានាធិបតី ហើយវាជាផែនការដ៏ទូលំទូលាយមួយ ដែលយើងកំពុងរួមគ្នាដើម្បីដាក់ចេញនៅថ្ងៃបន្ទាប់»។ នៅពេលត្រូវបានសួរថា តើអ៉ីស្រាអែលនឹងប្រើវិធីផ្សេងដើម្បីបញ្ចប់សង្រ្គាម និងដើម្បីធានាដល់ការដោះលែងចំណាប់ខ្មាំងឬទេ? លោក Witkoff បាននិយាយថា «យើងគិតថា នឹងអាចដោះស្រាយតាមវិធីមួយ ឬផ្សេង ប្រាកដណាស់មុនដំណាច់ឆ្នាំនេះ»។

លោក Witkoff មិនបានផ្តល់ព័ត៌មានលម្អិតបន្ថែម ឬបញ្ចេញសមាសភាពចូលរួមកិច្ចប្រជុំនេះទេ។ បើតាមក្រសួងការបរទេសអាមេរិក រដ្ឋមន្ត្រីការបរទេស លោក Marco Rubio ក៏នឹងជួបរដ្ឋមន្ត្រីការបរទេសអ៉ីស្រាអែល លោក Gideon Saar នៅក្នុងទីក្រុងវ៉ាស៉ីនតោន នាថ្ងៃពុធនេះផងដែរ។

គួរបញ្ជាក់ថា អាជ្ញាធរសុខាភិបាលហ្កាហ្សា បានឱ្យដឹងថា ការវាយប្រហាររបស់អ៉ីស្រាអែលលើតំបន់ហ្កាហ្សា ចាប់តាំងពីខែតុលា ឆ្នាំ ២០២៣ បានសម្លាប់ជនជាតិប៉ាឡេស្ទីនជាង ៦២ ០០០នាក់ បង្កឱ្យមានគ្រោះអត់ឃ្លាន និងការផ្លាស់ទីលំនៅទូទាំងតំបន់៕