(កូប៉ិនហាក)៖ ទូរទស្សន៍ DR របស់ដាណឺម៉ាក បានរាយការណ៍ដោយដក់ស្រង់សម្តីពីរដ្ឋមន្រ្តីថា រដ្ឋមន្រ្តីការបរទេសដាណឺម៉ាក បានកោះហៅមន្រ្តីជាន់ខ្ពស់ម្នាក់ ធ្វើការនៅស្ថានទូតអាមេរិកប្រចាំទីក្រុង Copenhagen ជុំវិញរបាយការណ៍​ដែលថា មានជនជាតិ​អាមេរិក​​ កំពុង​ធ្វើ​សកម្មភាពបំភាន់សាធារណមតិ​នៅ Greenland។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃពុធ ទី២៧ ខែសីហា ឆ្នាំ ២០២៥។

ប្រធានាធិបតីអាមេរិក លោក ដូណាល់ ត្រាំ ធ្លាប់និយាយថា ចង់ឱ្យសហរដ្ឋអាមេរិកកាន់កាប់កោះក្នុងតំបន់អាកទិក ដែលសម្បូរទៅដោយរ៉ែ និងជាទីតាំងយុទ្ធសាស្ត្រសន្តិសុខជាតិ និងអន្តរជាតិមួយនេះ ហើយមិនបដិសេធការប្រើប្រាស់កម្លាំងដើម្បីធ្វើដូច្នេះឡើយ។

រដ្ឋាភិបាលដាណឺម៉ាកជឿថា យ៉ាងហោចណាស់ជនជាតិអាមេរិក ៣នាក់ ដែលមានទំនាក់ទំនងជាមួយរដ្ឋបាលលោក ត្រាំ បានចូលរួមក្នុងការផ្សព្វផ្សាយបំភាន់សាធារណមតិ នៅក្នុងដែនដី Greenland។ តាមទូរទស្សន៍ DR លោករដ្ឋមន្ត្រីការបរទេស Lars Lokke Rasmussen បានប្រាប់ DR ថា «ការប៉ុនប៉ងណាមួយ ដើម្បីជ្រៀតជ្រែកកិច្ចការផ្ទៃក្នុងដាណឺម៉ាក ប្រាកដជាមិនអាចទទួលយកបានឡើយ។ ក្នុង​ន័យ​នេះ ខ្ញុំ​បាន​ស្នើ​ឱ្យ​ក្រសួង​ការ​បរទេស​កោះ​ហៅមន្រ្តី​ទូត​អាមេរិក​មក​សន្ទនា»។

ជុំវិញសេចក្តីរាយការណ៍នេះ ក្រសួងការបរទេសដាណឺម៉ាក មិនទាន់ចេញមកបញ្ជាក់ទេ ខណៈបេសកកម្មរបស់សហរដ្ឋអាមេរិក នៅទីក្រុង Copenhagen មិន​អាច​ទាក់ទង​បាន៕