(សេអ៊ូល)៖ សភាប្រទេសកូរ៉េខាងត្បូង នៅថ្ងៃពុធ ទី២៧ ខែសីហា បានអនុម័តសេចក្តីព្រាងច្បាប់មួយ ដើម្បីហាមឃាត់ការប្រើប្រាស់ទូរស័ព្ទដៃ និងឧបករណ៍ឌីជីថលផ្សេងទៀតនៅក្នុងថ្នាក់រៀនទូទាំងប្រទេស ខណៈដែលការព្រួយបារម្ភអំពីឥទ្ធិពលនៃការប្រើប្រាស់បណ្ដាញសង្គមក្នុងចំណោមយុវជនកំពុងកើនឡើង។ ច្បាប់នេះនឹងត្រូវចូលជាធរមានចាប់ពីខែមីនា ឆ្នាំក្រោយតទៅ។ នេះបើយោងតាមាការចេញផ្សាយដោយ ទីភ្នាក់ងារសារព័ត៌មាន Reuters។

យោងតាមមជ្ឈមណ្ឌលស្រាវជ្រាវ Pew កូរ៉េខាងត្បូងគឺជាប្រទេសមួយក្នុងចំណោមប្រទេសដែលមានការតភ្ជាប់ឌីជីថលច្រើនជាងគេបំផុតនៅលើពិភពលោក ដោយប្រជាជន ៩៨% មានទូរស័ព្ទស្មាតហ្វូន។ លោក Cho Jung-hun សមាជិកសភាមួយរូបដែលគាំទ្រច្បាប់នេះបានថ្លែងថា «ការញៀននឹងបណ្ដាញសង្គមរបស់យុវជនយើង គឺស្ថិតក្នុងកម្រិតធ្ងន់ធ្ងរហើយ។ កូនៗរបស់យើងភ្នែកឡើងក្រហមរាល់ព្រឹក ព្រោះពួកគេលេង Instagram រហូតដល់ម៉ោង ២ ឬ ៣ ទៀបភ្លឺ»។

ទិន្នន័យពីក្រសួងអប់រំកាលពីឆ្នាំមុនក៏បានបង្ហាញដែរថា សិស្សប្រមាណ ៣៧% និយាយថាបណ្ដាញសង្គមប៉ះពាល់ដល់ជីវិតប្រចាំថ្ងៃរបស់ពួកគេ ខណៈ ២២% មានអារម្មណ៍ថប់បារម្ភនៅពេលមិនបានប្រើប្រាស់វា។

គួរបញ្ជាក់ថា ទោះបីជាសាលារៀនជាច្រើននៅកូរ៉េខាងត្បូង មានបទបញ្ជាផ្ទៃក្នុងរួចហើយក្តី ក៏ច្បាប់ថ្មីនេះនឹងធ្វើឲ្យការហាមឃាត់នេះមានលក្ខណៈផ្លូវការទូទាំងប្រទេស។ ទោះយ៉ាងណា ការប្រើប្រាស់ឧបករណ៍ឌីជីថល នៅតែត្រូវបានអនុញ្ញាតសម្រាប់សិស្សមានពិការភាព ឬសម្រាប់គោលបំណងអប់រំ។ ក្រុមអ្នកតស៊ូមតិយុវជនមួយចំនួនបានជំទាស់នឹងការហាមឃាត់នេះ ដោយលើកឡើងថាវាអាចរំលោភលើសិទ្ធិមនុស្សរបស់កុមារ៕