(ប៉ារីស)៖ ប្រធានាធិបតីបារាំង លោក Emmanuel Macron កាលពីថ្ងៃអង្គារ បានចេញលិខិតចំហមួយ ដោយបានច្រានចោលទាំងស្រុងនូវការអះអាងរបស់នាយករដ្ឋមន្ត្រីអ៉ីស្រាអែល លោក Benjamin Netanyahu ដែលបានចោទប្រកាន់លោកថា បានដុតបញ្ឆេះមនោគមវិជ្ជាប្រឆាំងជនជាតិជ្វីហ្វ ដោយបានសង្កត់ធ្ងន់ថា ការប្រយុទ្ធប្រឆាំងនឹងមនោគមវិជ្ជានេះ មិនគួរត្រូវយកមកធ្វើជា «អាវុធ» នយោបាយឡើយ។ នេះបើយោងតាមការចេញផ្សាយ ដោយទីភ្នាក់ងារសារព័ត៌មាន Xinhua នៅថ្ងៃទី២៧ ខែសីហា។

ការឆ្លើយតបរបស់លោក Macron នេះ ធ្វើឡើងបន្ទាប់ពីលោក Netanyahu បានផ្ញើលិខិតមួយកាលពីថ្ងៃទី១៧ ខែសីហា ដោយបានចោទប្រកាន់មេដឹកនាំបារាំងរូបនេះថា បានចាក់ «សាំងបន្ថែមលើភ្លើងប្រឆាំងជ្វីហ្វ» តាមរយៈផែនការទទួលស្គាល់រដ្ឋប៉ាឡេស្ទីននៅខែកញ្ញាខាងមុខនេះ។

នៅក្នុងលិខិតរបស់លោក លោក Macron បានសរសេរថា «ការប្តេជ្ញាចិត្តរបស់យើងក្នុងការធានាឲ្យប្រជាជនប៉ាឡេស្ទីនមានរដ្ឋមួយ គឺកើតចេញពីជំនឿរបស់យើងដែលថាសន្តិភាពយូរអង្វែង គឺចាំបាច់សម្រាប់សន្តិសុខរបស់រដ្ឋអ៉ីស្រាអែល និងសម្រាប់ដំណើរឆ្ពោះទៅរកការធ្វើឲ្យមានប្រក្រតីភាពក្នុងតំបន់ ដែលយើងគាំទ្រ»។ លោកបានបន្ថែមថា សន្តិភាពយូរអង្វែង ទាមទារឲ្យមានការបង្កើតរដ្ឋប៉ាឡេស្ទីនអធិបតេយ្យមួយដែលគ្មានយោធា ដែលទទួលស្គាល់អ៉ីស្រាអែល និងសិទ្ធិទទួលបានសន្តិសុខរបស់ខ្លួន។

ទន្ទឹមគ្នានេះ លោក Macron ក៏បានព្រមានលោក Netanyahu ផងដែរ អំពីប្រតិបត្តិការយោធាថ្មីៗរបស់អ៉ីស្រាអែលនៅតំបន់ហ្កាហ្សា រួមទាំង «ការបង្ខំឲ្យផ្លាស់ទីលំនៅ និងការបង្កទុរ្ភិក្សដោយចេតនា» ដោយថា នឹង «មិនអាចនាំមកនូវជ័យជម្នះយូរអង្វែងសម្រាប់អ៉ីស្រាអែលបានឡើយ»៕