(រ៉ូម)៖ នាយករដ្ឋមន្ត្រីអ៉ីតាលី លោកស្រី ចរចា ម៉េឡូនី (Giorgia Meloni) នៅថ្ងៃពុធនេះ បានចេញមុខថ្កោលទោសយ៉ាងខ្លាំងក្លា ចំពោះការសម្លាប់អ្នកសារព័ត៌មាននៅតំបន់ហ្កាហ្សា ដោយហៅទង្វើនេះថា «មិនអាចដោះសាបាន» និងជា «ការវាយប្រហារដែលមិនអាចទទួលយកបាន»។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters។

ការថ្កោលទោសនេះ ធ្វើឡើងបន្ទាប់ពីការវាយប្រហាររបស់អ៉ីស្រាអែលទៅលើមន្ទីរពេទ្យ Nasser នៅភាគខាងត្បូងតំបន់ហ្កាហ្សា កាលពីថ្ងៃចន្ទ ដែលបានសម្លាប់មនុស្សយ៉ាងតិច ២០នាក់ ដោយនៅក្នុងនោះមានអ្នកសារព័ត៌មាន ៥នាក់ ដែលធ្វើការឱ្យទីភ្នាក់ងារព័ត៌មាន Reuters, Associated Press, Al Jazeera និងស្ថាប័នផ្សេងទៀត។

ថ្លែងនៅក្នុងសន្និសីទនយោបាយមួយ លោកស្រី ម៉េឡូនី បានបញ្ជាក់ជំហរច្បាស់ៗថា «ទោះបីយើងមិនស្ទាក់ស្ទើរក្នុងការការពារអ៉ីស្រាអែលក៏ដោយ ក៏យើងមិនអាចបិទភ្នែកនៅស្ងៀមបានដែរ នៅពេលដែលការឆ្លើយតបបានឈានដល់កម្រិតហួសហេតុ និងសម្លាប់ជនស៊ីវិលស្លូតត្រង់»។ លោកស្រីបានហៅការសម្លាប់អ្នកកាសែតថា ជាទង្វើប្រឆាំងនឹង «អ្នកដែលប្រថុយជីវិតដើម្បីរាយការណ៍ការពិតពីសោកនាដកម្មសង្គ្រាម»។

លើសពីនេះ លោកស្រីនាយករដ្ឋមន្ត្រីអ៊ីតាលីរូបនេះ ក៏បានអំពាវនាវឱ្យអ៉ីស្រាអែលបញ្ចប់ការកាន់កាប់យោធានៅហ្កាហ្សា និងបើកផ្លូវឲ្យជំនួយមនុស្សធម៌ ព្រមទាំងបញ្ឈប់ការពង្រីកការតាំងទីលំនៅនៅតំបន់ West Bank៕