(តេហេរ៉ង់)៖ រដ្ឋមន្ត្រីការបរទេសអ៉ីរ៉ង់ លោក Abbas Araghchi បានបញ្ជាក់នៅថ្ងៃពុធនេះថា ក្រុមអធិការរបស់ទីភ្នាក់ងារឃ្លាំមើលនុយក្លេអ៊ែររបស់ UN ត្រូវបានអនុញ្ញាតឱ្យវិលត្រឡប់ចូលប្រទេសវិញហើយ ប៉ុន្តែលោកបានបដិសេធរបាយការណ៍ ដែលថាកិច្ចព្រមព្រៀងសហប្រតិបត្តិការថ្មីត្រូវបានបង្កើតឡើង។ នេះបើយោងតាមការចេញផ្សាយ ដោយទីភ្នាក់ងារសារព័ត៌មាន Xinhua។

លោក Araghchi បានប្រាប់ទីភ្នាក់ងារសារព័ត៌មានរដ្ឋ IRNA ថា អធិការទាំងនោះត្រូវបានអនុញ្ញាតឱ្យចូលមក ដើម្បីត្រួតពិនិត្យការផ្លាស់ប្តូរឥន្ធនៈនៅឯរោងចក្រថាមពលនុយក្លេអ៊ែរ Bushehr ប៉ុណ្ណោះ។ លោកបានបន្ថែមថា «គ្មានអត្ថបទណាមួយត្រូវបានចុះកិច្ចព្រមព្រៀងឡើយ» ទោះបីមានការដោះដូរការផ្តល់ជូនគ្នាទៅវិញទៅមកក៏ដោយ។

ការបញ្ជាក់របស់លោក Araghchi ធ្វើឡើងបន្ទាប់ពីប្រធានទីភ្នាក់ងារថាមពលអាតូមិកអន្តរជាតិ (IAEA) លោក Rafael Grossi បានប្រកាសថា «ក្រុមអធិការដំបូងរបស់ IAEA បានត្រឡប់ទៅអ៉ីរ៉ង់វិញហើយ»។

គួរបញ្ជាក់ថា អ៉ីរ៉ង់បានផ្អាកកិច្ចសហប្រតិបត្តិការជាមួយ IAEA កាលពីដើមខែកក្កដា ក្រោយការវាយប្រហារពីសំណាក់អ៉ីស្រាអែល និងសហរដ្ឋអាមេរិកទៅលើទីតាំងនុយក្លេអ៊ែររបស់ខ្លួន។ ជុំវិញការរឹតបន្តឹងនេះ មហាអំណាចអឺរ៉ុបបានព្រមានថា ពួកគេនឹងស្នើឱ្យ UN ដាក់ទណ្ឌកម្មអ៊ីរ៉ង់ឡើងវិញ​ តាមរយៈយន្តការ «snapback» ប្រសិនបើអ៉ីរ៉ង់រក្សាចំហររបស់ខ្លូនចំពោះ IAEA ត្រឹមដំណាច់ខែសីហានេះ៕