(​UN)៖ សមាជិកទាំងអស់នៃក្រុមប្រឹក្សាសន្តិសុខអង្គការសហប្រជាជាតិ លើកលែងតែសហរដ្ឋអាមេរិក កាលពីថ្ងៃពុធ ទី២៧ ខែសីហា បាននិយាយថាគ្រោះទុរ្ភិក្សនៅក្នុងតំបន់ហ្កាហ្សា គឺជា វិបត្តិមួយបង្កឡើងដោយស្នាដៃមនុស្ស និងបានព្រមានថាការប្រើប្រាស់ការបង្អត់អាហារជាអាវុធនៃសង្រ្គាមត្រូវបានហាមឃាត់នៅក្រោមច្បាប់មនុស្សធម៌អន្តរជាតិ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

នៅក្នុងសេចក្ដីថ្លែងការណ៍រួមមួយ សមាជិកក្រុមប្រឹក្សាសន្តិសុខ ១៤ប្រទេស លើកលែងសហរដ្ឋអាមេរិក បានអំពាវនាវឱ្យមានបទឈប់បាញ់បន្ទាន់មួយ ដោយគ្មានលក្ខខណ្ឌ និងអចិន្ត្រៃយ៍ ព្រមទាំងការដោះលែងចំណាប់ខ្មាំងទាំងអស់ដែលកំពុងជាប់ឃុំក្នុងតំបន់ហ្កាហ្សា ក៏ដូចជាការបង្កើនលំហូរជំនួយមនុស្សធម៌ចូលទៅក្នុងតំបន់ហ្កាហ្សា។ ប្រទេសទាំងនេះក៏បានអំពាវនាវផងដែរ ឱ្យអ៉ីស្រាអែលលុបចោលជាបន្ទាន់ និងដោយគ្មានលក្ខខណ្ឌការរឹតត្បិតការផ្ដល់ជំនួយដល់ប្រជាជនប៉ាឡេស្ទីន។ «គ្រោះទុរ្ភិក្សក្នុងតំបន់ហ្កាហ្សាត្រូវតែបញ្ឈប់ជាបន្ទាន់...ភាពអាសន្នមនុស្សធម៌ ត្រូវតែដោះស្រាយជាបន្ទាន់ដោយគ្មានការពន្យារពេល រីឯអ៉ីស្រាអែលត្រូវតែផ្លាស់ប្ដូរវិធីសាស្ត្រ»។ នេះជាការគូសបញ្ជាក់បន្ថែមរបស់សេចក្ដីថ្លែងការណ៍រួមខាងលើ។

គួរបញ្ជាក់ថា បច្ចុប្បន្ន ទីក្រុងហ្កាហ្សា និងតំបន់ជុំវិញត្រូវបានអង្គការសហប្រជាជាតិប្រកាសទទួលស្គាល់ជាផ្លូវការថាពិតជាកំពុងកើតមានគ្រោះទុរ្ភិក្សធ្ងន់ធ្ងរប្រាកដមែន ហើយអាចនឹងកាន់តែ រីករាលដាលទៀតផង។ តាម UN ប្រជាជនប៉ាឡេស្ទីន ៥១៤ ០០០នាក់ ក្នុងតំបន់ហ្កាហ្សាកំពុងជួបប្រទះភាពអត់ឃ្លាន ហើយចំនួននេះអាចនឹងកើនដល់ ៦៤១ ០០០នាក់ នៅដំណាច់ខែកញ្ញាខាងមុខ៕