(កៀវ)៖ ប្រធានាធិបតី លោក វ៉ូឡូឌីមៀ ហ្សេលេនស្គី បានចុះហត្ថលេខាលើក្រឹត្យមួយ កាលពីថ្ងៃពុធសប្តាហ៍នេះ ដោយតែងតាំងអតីតមន្រ្តីកំពូលម្នាក់នៃគណៈរដ្ឋមន្រ្តី គឺលោកស្រី Olha Stefanishyna ឱ្យធ្វើជាអគ្គរដ្ឋទូតថ្មីរបស់អ៊ុយក្រែនប្រចាំសហរដ្ឋអាមេរិក។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃព្រហស្បតិ៍ ទី២៨ ខែសីហា ឆ្នាំ ២០២៥។

តាមសុន្ទរកថាជាវីដេអូ លោក ហ្សេលេនស្គី និយាយថា ក្រឹត្យមួយស្តីពីការតែងតាំង លោកស្រី Stefanishyna អាយុ ៣៩ ឆ្នាំបានចុះហត្ថលេខារួចហើយ។ លោកស្រីនឹងចូលកាន់តួនាទីជាឯកអគ្គរដ្ឋប្រចាំអាមេរិក បន្តពីលោកស្រី Oksana Markarova ដែលបានកាន់តំណែងនេះអស់រយៈពេល ៦ឆ្នាំមកហើយ និងអំឡុងពេលនៃសង្រ្គាមជាមួយរុស្ស៉ី។

គួរបញ្ជាក់ថា លោកស្រី Stefanishyna បានបម្រើការនៅក្នុងរដ្ឋបាលរបស់លោក ហ្សេលេនស្គី ជាឧបនាយករដ្ឋមន្ត្រីទទួលបន្ទុកការធ្វើសមាហរណកម្មអ៊ឺរ៉ុប និងអឺរ៉ុប-អាត្លង់ទិក ដោយដើរតួនាទីយ៉ាងសំខាន់ក្នុងការនាំអ៊ុយក្រែន ចូលរួមជាមួយស្ថាប័នលោកខាងលិច។ លោកស្រីក៏ធ្លាប់ជារដ្ឋមន្ត្រីក្រសួងយុត្តិធម៌ផងដែរ៕