(កៀវ)៖ នៅថ្ងៃព្រហស្បតិ៍ ទី២៨ ខែសីហា ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បាននិយាយថា ក្រោយការវាយប្រហារទ្រង់ទ្រាយធំថ្មីទៀតរបស់រុស្ស៉ីតាមផ្លូវអាកាស មកលើរដ្ឋធានីកៀវកាលពីវេលាយប់កន្លងទៅ មនុស្សយ៉ាងហោច៨នាក់ស្លាប់ និងជាង២០នាក់ផ្សេងទៀត បានរងរបួស។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

បើតាមលោក ហ្សេលេនស្គី ក្នុងចំណោមអ្នកដែលបាត់បង់ជីវិត គឺរួមមានទាំងកុមារ ហើយបើតាមរដ្ឋមន្រ្តីមហាផ្ទៃអ៊ុយក្រែន ក្រៅពីមនុស្សស្លាប់និងរបួស អគារលំនៅដ្ឋាន ព្រមទាំងសំណង់ជាច្រើនផ្សេងទៀត នៅទូទាំងទីក្រុង ក៏បានរងការខូចខាតនិងបំផ្លិចបំផ្លាញផងដែរ។

លោកប្រធានាធិបតីអ៊ុយក្រែន បាននិយាយថា ការវាយប្រហារថ្មីនេះ បន្តស្តែងឱ្យឃើញថា រុស្ស៉ីតាមពិតគឺមិនខ្វល់អំពីកិច្ចប្រឹងប្រែង​ស្វែងរកសន្តិភាព និងបញ្ចប់ជម្លោះដោយសន្តិវិធីឡើយ ដោយទីក្រុងមូស្គូនៅតែបន្តជ្រើសរើសយកការសម្លាប់ជីវិតមនុស្ស ជាជាងការចរចា​បញ្ចប់សង្រ្គាម។ ជាថ្មីម្តងទៀត លោក ហ្សេលេនស្គី បានបន្តអំពាវនាវឱ្យអន្តរជាតិ បញ្ចេញប្រតិកម្មធ្ងន់ៗនិងជាបន្ទាន់ ចំពោះទង្វើរបស់រុស្ស៉ី ហើយជាពិសេសស្នើឱ្យសម្ព័ន្ធមិត្តរបស់រុស្ស៉ី ដូចជាចិននិងហុងគ្រី ប្រកាន់ជំហររឹងមាំជាងមុន។

គួរបញ្ជាក់ថា យោងតាមការអះអាងរបស់យោធាអ៊ុយក្រែន យន្តហោះដ្រូននិងមីស៉ីល ត្រូវបានប្រើប្រាស់ក្នុងការវាយប្រហារខាងលើ​របស់រុស្ស៉ី ប៉ុន្តែមិនបានបញ្ជាក់ចំនួននោះទេ៕