(វ៉ាស៉ីនតោន)៖ នាថ្ងៃព្រហស្បតិ៍ ទី២៨ ខែសីហា រដ្ឋបាលប្រធានាធិបតី លោក ដូណាល់ ត្រាំ បានបោះជំហានដើម្បីដាក់ការរឹតត្បិត​លើ រយៈពេលដែលនិស្សិតនិងអ្នកសារព័ត៌មានបរទេស អាចស្នាក់នៅក្នុងសហរដ្ឋអាមេរិក ខណៈវាជាវិធានការថ្មីចុងក្រោយមួយទៀត ដើម្បីរឹតបន្តឹងការធ្វើអន្តោប្រវេសន៍ដោយស្របច្បាប់។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

ក្នុងសំណើកែប្រែនោះ ជនបរទេសនឹងមិនត្រូវអនុញ្ញាតឱ្យស្នាក់នៅលើសពី៤ឆ្នាំ ដោយប្រើទិដ្ឋាការនិស្សិតនៅសហរដ្ឋអាមេរិកឡើយ។ រីឯអ្នកកាសែតបរទេសវិញ នឹងត្រូវកម្រិតឱ្យអាចស្នាក់នៅបានត្រឹម២៤០ថ្ងៃ ឬប្រហែល៨ខែ និងអាចស្នើសុំពន្យារបន្ថែមបាន ប៉ុន្តែការស្នើពន្យារ​នោះ គឺម្តងៗបានត្រឹម២៤០ថ្ងៃដូចគ្នាប៉ុណ្ណោះ។

គួរបញ្ជាក់ថា ពីមុនមក រយៈពេលដែលនិស្សិតបរទេសអាចស្នាក់នៅអាមេរិក គឺអាស្រ័យលើរយៈពេលនៃកម្មវិធីសិក្សារបស់ពួកគេផ្ទាល់ ខណៈរយៈពេលស្នាក់នៅរបស់អ្នកកាសែតបរទេសវិញ គឺអាស្រ័យលើ​រយៈពេលបំពេញបេសកកម្ម ដែលជាធម្មតាគឺច្រើនឆ្នាំ៕