(ណៃពិដោ)​៖ នាថ្ងៃព្រហស្បតិ៍ ទី២៨ ខែសីហា ប្រព័ន្ធផ្សព្វផ្សាយរដ្ឋនៅមីយ៉ាន់ម៉ា បានរាយការណ៍ថា ប្រមុខរដ្ឋាភិបាលយោធា លោក Min Aung Hlaing នឹងបំពេញទស្សនកិច្ចទៅកាន់ប្រទេសចិន ដើម្បីចូលរួមកិច្ចប្រជុំកំពូលនៃអង្គការសហប្រតិបត្តិការសៀងហៃ (SCO)។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

លោក Min Aung Hlaing នឹងធ្វើដំណើរទៅចូលរួមកិច្ចប្រជុំ ដែលចាប់ផ្តើមនាថ្ងៃអាទិត្យចុងសប្តាហ៍នេះ តបតាមការអញ្ជើញរបស់​ប្រធានាធិបតីចិន លោក ស៉ី ជីនពីង។ ក្រៅពីជួបលោក ស៉ី និងមេដឹកនាំដទៃ ក្នុងកិច្ចប្រជុំនោះ ដែលរៀបចំឡើងនៅក្នុងទីក្រុង Tianjin លោក Min Aung Hlaing ក៏នឹងបើកកិច្ចពិភាក្សាជាមួយក្រុមមន្រ្តីចិន ហើយធ្វើទស្សនកិច្ចទៅកាន់ តំបន់ផ្សេងទៀតនៃប្រទេសចិនផងដែរ។ ដំណើរទស្សនកិច្ចនេះ គឺមុនពេលមីយ៉ាន់ម៉ារៀបចំការបោះឆ្នោតសកល នៅចុងឆ្នាំនេះ។

គួរបញ្ជាក់ថា មីយ៉ាន់ម៉ាបានធ្លាក់ក្នុងភាពវឹកវរ ចាប់តាំងពីយោធាបានធ្វើរដ្ឋប្រហារផ្តួលរំលំរដ្ឋាភិបាលស៉ីវិល ដឹកនាំដោយលោកស្រី អោងសាន ស៊ូជី កាលពីឆ្នាំ២០២១ ដែលក្រោយមកបានបង្កឱ្យផ្ទុះចលនាបះបោរប្រដាប់អាវុធ និងសង្រ្គាមស៉ីវិលដ៏អាក្រក់ រហូតមកទល់សព្វថ្ងៃ។ ប្រទេសអាស៊ានមួយនេះ គ្រោងនឹងចាប់ផ្តើមដំណើរការបោះឆ្នោត នៅថ្ងៃទី២៨ ខែធ្នូ ដែលនឹងជាការបោះឆ្នោតសកលលើកដំបូងរបស់ខ្លួន ក្នុងរយៈពេលជិត៥ឆ្នាំ៕