(បាងកក)៖ នាពេលនេះ ការធ្វើពាណិជ្ជកម្មតាមព្រំប្រទល់របស់ប្រទេសថៃ កំពុងប្រឈមសម្ពាធយ៉ាងខ្លាំង ចំពោះមុខការបន្តអូសបន្លាយ​បិទច្រកព្រំដែនទាំងអស់ ជាមួយប្រទេសកម្ពុជា ចាប់តាំងតែពីពាក់កណ្តាលឆ្នាំ២០២៥នេះ រួមទាំងការបិទច្រកព្រំដែនជាមួយប្រទេសមីយ៉ាន់ម៉ាថែមទៀត កាលពីពេលថ្មីៗ។ នេះបើតាមការចេញផ្សាយដោយ សារព័ត៌មានថៃ The Nation នាថ្ងៃព្រហស្បតិ៍ ទី២៨ ខែសីហា ឆ្នាំ២០២៥។

កាសែត The Nation បានអះអាងថា ផលប៉ះពាល់រួមបញ្ចូលគ្នាខាងលើ កំពុងគំរាមកំហែងធ្វើឱ្យថៃអាចទទួលរងការខាតបង់ធ្ងន់ខ្លាំង នៅ​ក្នុងការធ្វើពាណិជ្ជកម្មជាមួយកម្ពុជានិងមីយ៉ាន់ម៉ា ដែលមានទំហំសរុបរហូតដល់៥៧០ពាន់លានបាត ឬស្មើនឹង១៧.៦ពាន់លានដុល្លារអាមេរិក កាលពីឆ្នាំ២០២៤។ ការនាំចេញភាគច្រើនរបស់ថៃ នឹងត្រូវជាប់គាំង ហើយខ្សែចង្វាក់ផ្គត់ផ្គង់នានា​ដែលពាក់ព័ន្ធ នឹងត្រូវរងការរំខាន។

បើតាម The Nation កាលពីឆ្នាំ២០២៤ ការនាំចេញទំនិញរបស់ថៃទៅកាន់កម្ពុជា មានទំហំសរុប៣២៤.១៣ពាន់លានបាត ឬស្មើនឹងជាមធ្យម២៧ពាន់លានបាតក្នុងមួយខែៗ។ ការបន្តបិទច្រកព្រំដែន មានន័យថា ថៃប្រឈមការខាតបង់១២០ពាន់លានបាត ក្នុងការនាំចេញតាមផ្លូវគោកទៅកាន់កម្ពុជា សម្រាប់រយៈពេល៦ខែចុងក្រោយនៃឆ្នាំនេះ។ ទោះបីនៅមានទំនិញខ្លះនាំចេញតាមផ្លូវសមុទ្រ​ក៏ដោយ គឺវាមិនគ្រប់គ្រាន់ដើម្បីជំនួសច្រកផ្លូវគោលដ៏សំខាន់ ដែលបម្រើជាសរសៃឈាមនៃសេដ្ឋកិច្ចតាមព្រំដែនរបស់ប្រទេសថៃ នោះទេ។

គួរបញ្ជាក់ថា បើការបិទព្រំដែនជាមួយកម្ពុជា បន្តទៅមុខពេញមួយឆ្នាំ អត្រា GDP របស់ប្រទេសថៃ អាចនឹងត្រូវថយចុះប្រហែល ០.៣១ភាគរយ។ វិស័យនាំចេញសំខាន់ៗ៣ របស់ថៃទៅកាន់កម្ពុជា ដែលរងការរំខានខ្លាំងជាពិសេស រួមមានអាហារនិងភេសជ្ជៈ ដែលមានតម្លៃ៣២.៧៤ពាន់លានបាត, យានជំនិះនិងគ្រឿងបន្លាស់ ទំហំ១៨.៥៧ពាន់លានបាត ព្រមទាំងសារធាតុគីមនិងជីកសិកម្ម ទំហំ១៥.៣០ពាន់លានបាត៕