(វ៉ាស៉ីនតោន)៖ អ្នកស្រាវជ្រាវមួយក្រុមនិយាយថា អ៉ីរ៉ង់បានបើកប្រតិបត្តិការបោសសម្អាតទីតាំងមួយកន្លែង នៅភាគខាងជើងទីក្រុងតេហេរ៉ង់ ដែលរងការវាយប្រហារតាមផ្លូវអាកាសរបស់អ៉ីស្រាអែល ហើយទំនងជាលុបបំបាត់ភស្តុតាងនៃការងារអភិវឌ្ឍអាវុធនុយក្លេអ៊ែរ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃព្រហស្បតិ៍ ទី២៨ ខែសីហា ឆ្នាំ ២០២៥។

វិទ្យាស្ថាន Institute for Science and International Security លើកឡើងថា រូបភាពផ្កាយរណប បង្ហាញឱ្យឃើញពីកិច្ចខិតខំប្រឹងប្រែងរបស់អ៉ីរ៉ង់ ក្នុងការកម្ទេចអគារខូចខាត ឬរងការបំផ្លាញ ដែលទំនងជាសម្អាតរាល់សកម្មភាពស្រាវជ្រាវ និងអភិវឌ្ឍអាវុធនុយក្លេអ៊ែរ។

វិទ្យាស្ថាននេះ គឺជាក្រុមស្រាវជ្រាវឯករាជ្យ ដែលផ្តោតលើការបញ្ឈប់ការរីករាលដាលនៃអាវុធនុយក្លេអ៊ែរ ហើយត្រូវបានដឹកនាំដោយលោក David Albright អតីតមន្រ្តីអធិការកិច្ចនុយក្លេអ៊ែររបស់អង្គការសហប្រជាជាតិ (UN)។ ភ្លាមៗ ស្ថានទូតអ៉ីរ៉ង់ប្រចាំ UN មិនបានឆ្លើយតបចំពោះសំណើសុំការអត្ថាធិប្បាយទេ។

គួរបញ្ជាក់ថា ទីក្រុងតេហេរ៉ង់ បានបដិសេធបំណងផលិតអាវុធនុយក្លេអ៊ែរ ហើយបាននិយាយម្តងហើយម្តងទៀតថា កម្មវិធីរបស់ខ្លួនគឺសម្រាប់គោលបំណងសន្តិភាព៕