(កៀវ)៖ អាជ្ញាធរអ៊ុយក្រែនបានឱ្យដឹងថា មនុស្សយ៉ាងតិច ១៤នាក់ ក្នុងនោះមានកុមារ ៣នាក់ បានស្លាប់បាត់បង់ជីវិត នៅក្នុងការវាយប្រហាររបស់រុស្ស៊ីមកលើរដ្ឋធានីកៀវ កាលពីព្រឹកព្រលឹមថ្ងៃព្រហស្បតិ៍។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters។

ចំពោះសោកនាដកម្មនេះ អភិបាលក្រុងកៀវបានប្រកាសយកថ្ងៃសុក្រ ទី២៩ ខែសីហា ជាទិវាកាន់ទុក្ខជាផ្លូវការ។ លោក Vitaliy Klitschko បានសរសេរនៅលើ Telegram ថា «ថ្ងៃស្អែក ទី២៩ ខែសីហា ត្រូវបានប្រកាសជាទិវាកាន់ទុក្ខនៅទីក្រុងកៀវ ដើម្បីរំឭកដល់វិញ្ញាណក្ខន្ធជនរងគ្រោះនៃការវាយប្រហារដ៏ធំរបស់សត្រូវមកលើរដ្ឋធានី»។ លោកបានបន្ថែមថា ទង់ជាតិនឹងត្រូវបង្ហូតចុះ ហើយកម្មវិធីកម្សាន្តនានានឹងត្រូវហាមឃាត់។

ប្រធានាធិបតីអ៊ុយក្រែន លោក Volodymyr Zelenskyy បានចេញសារថ្កោលទោសយ៉ាងខ្លាំងក្លា ដោយចាត់ទុកទង្វើនេះថាជា «ការសម្លាប់ជនស៊ីវិលដោយចេតនា និងគួរឲ្យរន្ធត់»។ លោកបានសង្កត់ធ្ងន់ថា ការវាយប្រហារនេះ គឺជាចម្លើយរបស់រុស្ស៊ីចំពោះការអំពាវនាវឲ្យមានបទឈប់បាញ់ ដោយលោកបានថ្លែងចំៗថា «រុស្ស៊ីជ្រើសរើសផ្លោងមីស៊ីល ជំនួសឲ្យតុចរចា» ព្រមទាំងបានបន្តអំពាវនាវឱ្យអន្តរជាតិ បញ្ចេញប្រតិកម្មធ្ងន់ៗនិងជាបន្ទាន់ ចំពោះទង្វើរបស់រុស្ស៉ីនេះ។

គួរបញ្ជាក់ថា ការវាយប្រហារនេះបានបង្កការខូចខាតនៅទូទាំង ៨ខណ្ឌនៃរដ្ឋធានី។ ជាពិសេសនៅខណ្ឌ Darnytskyi ផ្នែកមួយនៃអគារស្នាក់នៅកម្ពស់ ៥ជាន់ត្រូវបានបំផ្លាញទាំងស្រុង ហើយប្រតិបត្តិការកំពុងបន្តស្វែងរកអ្នកដែលជាប់នៅក្រោមគំនរបាក់បែក។ ទន្ទឹមនឹងនេះ ឯកអគ្គរដ្ឋទូតសហភាពអឺរ៉ុបប្រចាំអ៊ុយក្រែន លោកស្រី Katarina Mathernova ក៏បានបញ្ជាក់ដែរថា អាគារប្រតិភូសហភាពអឺរ៉ុបនៅទីក្រុងកៀវ បានរងការខូចខាតយ៉ាងធ្ងន់ធ្ងរដោយសាររលកផ្ទុះ៕