(បាងកក)៖ អាជ្ញាធរគ្រប់គ្រងគ្រោះមហន្តរាយថៃ បានឱ្យដឹងនៅថ្ងៃព្រហស្បតិ៍ថា មនុស្សយ៉ាងតិច ៥នាក់បានស្លាប់ និង ៧នាក់ទៀតកំពុងបាត់ខ្លួន បន្ទាប់ពីភ្លៀងធ្លាក់ខ្លាំង និងការរអិលបាក់ដីដែលបង្កឡើង ដោយព្យុះ Kajiki ដែលបានវាយប្រហារតំបន់ភាគខាងជើងប្រទេស។ នេះបើយោងតាមការចេញផ្សាយ ដោយទីភ្នាក់ងារសារព័ត៌មាន Reuters។

ទីភ្នាក់ងារនេះបានបញ្ជាក់ថា ទឹកជំនន់ និងការរអិលបាក់ដីបានវាយប្រហារខេត្តចំនួន ១២ នៅភាគខាងជើង និងឦសាន រួមមានខេត្ត Chiang Mai, hiang Rai និង Mae Hong Son ដែលបានប៉ះពាល់ដល់ប្រជាជនជាង ១,៨០០គ្រួសារ។

គួរបញ្ជាក់ថា មកដល់ថ្ងៃព្រហស្បតិ៍នេះ ក្រសួងមហាផ្ទៃថៃបានបញ្ជាក់ថា ខេត្តចំនួន៨ នៅតែបន្តរងការជន់លិចនៅឡើយ ដែលកំពុងប៉ះពាល់ដល់ប្រជាជនជិត ៦,០០០នាក់ មកពី ១,៦០០គ្រួសារ៕