(ហ្កាហ្សា)៖ មន្ត្រីសុខាភិបាលក្នុងតំបន់បានឲ្យដឹងថា កងកម្លាំងអ៉ីស្រាអែលបានផ្តាច់ជីវិតជនជាតិប៉ាឡេស្ទីនយ៉ាងតិច ១៦នាក់នៅទូទាំងតំបន់ហ្កាហ្សា កាលពីថ្ងៃព្រហស្បតិ៍ និងធ្វើឲ្យមនុស្សរាប់សិបនាក់ផ្សេងទៀតរងរបួស ចំពេលដែលប្រជាពលរដ្ឋរាយការណ៍ពីការទម្លាក់គ្រាប់បែកកាន់តែខ្លាំងក្លានៅជាយក្រុងហ្កាហ្សា។ នេះបើយោងតាមការចេញផ្សាយ ដោយទីភ្នាក់ងារសារព័ត៌មាន Reuters។

ប្រជាជននៅទីក្រុងហ្កាហ្សាបានឲ្យដឹងថា ក្រុមគ្រួសារជាច្រើនកំពុងភៀសខ្លួនចេញពីផ្ទះសម្បែង ដោយភាគច្រើនបានធ្វើដំណើរឆ្ពោះទៅកាន់តំបន់ឆ្នេរ ខណៈកងកម្លាំងអ៉ីស្រាអែលបានទម្លាក់គ្រាប់បែកលើជាយក្រុងភាគខាងកើតដូចជា Shejaia, Zeitoun និង Sabra។ ក្រសួងសុខាភិបាលបានបញ្ជាក់ថា តួលេខអ្នកស្លាប់ក្នុងរយៈពេល ២៤ម៉ោងចុងក្រោយនេះ បានកើនឡើងដល់ ៧១នាក់។

គួរបញ្ជាក់ថា ប្រតិបត្តិការទ្រង់ទ្រាយធំរបស់អ៉ីស្រាអែល ដើម្បីវាយដណ្តើមយកទីក្រុងហ្កាហ្សា នៅតែបន្តទៅមុខ ទោះបីមានការអំពាវនាវពីសហគមន៍អន្តរជាតិឲ្យពិចារណាឡើងវិញ ដោយសារក្តីបារម្ភថា ប្រតិបត្តិការនេះអាចបង្កជាមហន្តរាយមនុស្សធម៌ដ៏ធំ និងបង្ខំឲ្យជនភៀសខ្លួនប៉ាឡេស្ទីនប្រមាណមួយលាននាក់ត្រូវផ្លាស់ទីលំនៅម្តងទៀតកៅដោយ។ អ៉ីស្រាអែលបានចាត់ទុកទីក្រុងហ្កាហ្សាថាជា «ទីតាំងឈរជើងចុងក្រោយ» របស់ក្រុមហាម៉ាស។

ដោយឡែក យោធាអ៉ីស្រាអែលបានអះអាងក្នុងសេចក្តីថ្លែងការណ៍របស់ខ្លួនថា ប្រតិបត្តិការរបស់ខ្លួនគឺសំដៅលើ «អង្គការភេរវករ» និងហេដ្ឋារចនាសម្ព័ន្ធរបស់ពួកគេ។ យោធាបានបន្ថែមថា ខ្លួនបានសម្លាប់សកម្មប្រយុទ្ធ ៣នាក់ក្នុងរយៈពេលចុងក្រោយនេះ ប៉ុន្តែមិនបានបញ្ជាក់ពីរបៀបដែលខ្លួនកំណត់អត្តសញ្ញាណបុគ្គលទាំងនោះទេ៕