(តេហេរ៉ង់)៖ រដ្ឋមន្រ្តីការបរទេសអ៉ីរ៉ង់ លោក Abbas Araqchi បាននិយាយថា អ៉ីរ៉ង់ត្រៀមខ្លួនរួចរាល់ហើយ ដើម្បីបើកការចរចាដោយតម្លាភាព ជុំវិញបញ្ហាកម្មវិធីនុយក្លេអ៊ែរ ប្រសិនបើលោកខាងលិចមានឆន្ទៈស្មោះត្រង់។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី២៩ ខែសីហា ឆ្នាំ ២០២៥។

តាមលិខិតមួយផ្ញើទៅកាន់ប្រធានគោលនយោបាយការបរទេសសហភាពអឺរ៉ុប លោកស្រី Kaja Kallas «លោក Araqchi បានបញ្ជាក់ពីការត្រៀមខ្លួនរបស់អ៉ីរ៉ង់ ក្នុងការបន្តមធ្យោបាយការទូតដោយស្មើភាព និងមានតុល្យភាព ក្នុងលក្ខខណ្ឌដែលភាគីផ្សេងទៀត បង្ហាញពីឆន្ទៈ និងចៀសវាងសកម្មភាព ដែលប៉ះពាល់ដល់ឱកាសសម្រេចជោគជ័យ»។

ការលើកឡើងរបស់លោក Araqchi បានធ្វើឡើងប៉ុន្មានម៉ោង ក្រោយមហាអំណាចអឺរ៉ុប ជំរុញដំណើរការដាក់ទណ្ឌកម្មរបស់អង្គការសហប្រជាជាតិ លើទីក្រុងតេហេរ៉ង់ឡើងវិញ៕