(មូស្គូ)៖ កាលពីថ្ងៃព្រហស្បតិ៍ ទី២៨ ខែសីហា វិមានក្រឹមឡាំងបាននិយាយថា ខ្លួននៅតែមានចំណាប់អារម្មណ៍ ក្នុងកិច្ចចរចាស្វែងរក​សន្តិភាពសម្រាប់សង្រ្គាមនៅអ៊ុយក្រែន បើទោះបីជារុស្ស៉ីទើបតែបានបើកការវាយប្រហារទ្រង់ទ្រាយធំ និងយ៉ាងប្រល័យលើទីក្រុងកៀវ កាលពីវេលាយប់មុននោះក៏ដោយ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

កាលពីថ្ងៃព្រហស្បតិ៍ អ៊ុយក្រែនបានអះអាងថា ការវាយប្រហារថ្មីចុងក្រោយរបស់រុស្ស៉ីតាមផ្លូវអាកាស បានសម្លាប់មនុស្សយ៉ាងហោច ២៣នាក់ នៅរដ្ឋធានីកៀវ ក្នុងនោះរួមមានកុមារ៤នាក់។ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានលើកឡើងថា ទង្វើនោះគឺជាចម្លើយរបស់ទីក្រុងមូស្គូ ចំពោះកិច្ចប្រឹងប្រែងការទូតដើម្បីបិទបញ្ចប់សង្រ្គាម។ បើតាមយោធាអ៊ុយក្រែន រុស្ស៉ីបានប្រើប្រាស់យន្តហោះដ្រូននិងមីស៉ីលសរុបចំនួន៦២៩ ក្នុងការវាយប្រហាររបស់ខ្លួន។

នៅពេលត្រូវបានអ្នកកាសែតសាកសួរ ថាតើវាមានន័យបែបណារវាងការវាយប្រហារថ្មីចុងក្រោយនេះ និងការអះអាងរបស់ទីក្រុងមូស្គូ ​អំពីចេតនាចង់មើលឃើញវឌ្ឍនភាព ក្នុងកិច្ចចរចាសន្តិភាព អ្នកនាំពាក្យវិមានក្រឹមឡាំង លោក Dmitry Peskov បាននិយាយថា ភាគីទាំងសងខាង គឺកំពុងតែបន្តវាយប្រហារគ្នាទៅវិញទៅមក។

លោក Peskov បានគូសបញ្ជាក់យ៉ាងដូច្នេះថា «ប្រតិបត្តិការយោធាពិសេស (សង្រ្គាមនៅអ៊ុយក្រែន) នៅតែបន្ត។ អ្នកអាចមើលឃើញថា ការវាយប្រហារមកលើហេដ្ឋារចនាសម្ព័ន្ធរុស្ស៉ី ដែលជារឿយៗលើហេដ្ឋារចនាសម្ព័ន្ធស៉ីវិល ធ្វើឡើងដោយរដ្ឋាភិបាលទីក្រុងកៀវ ក៏កំពុងតែបន្តដែរ។ ចំណែក កងកម្លាំងយោធារបស់រុស្ស៉ី ក៏កំពុងបំពេញបេសកកម្មរបស់ពួកគេ​ដូចគ្នា»។ លោក Peskov បានអះអាងថា រុស្ស៉ីមិនដែលកំណត់គោលដៅដោយចេតនា លើជនស៉ីវិលឡើយ ពោលគឺតែទៅលើ​គោលដៅយោធាប៉ុណ្ណោះ។

យ៉ាងណាមិញ ខាងមន្រ្តីអ៊ុយក្រែនបានអះអាងថា ជនស៉ីវិលជាច្រើនបានស្លាប់ នៅប៉ុន្មានខែកន្លងមក អំឡុងការវាយប្រហាររបស់រុស្ស៉ី លើតំបន់ដែលមានមនុស្សរស់នៅប្រមូលផ្តុំ ហើយសរុបរាប់ពាន់នាក់បានបាត់បង់ជីវិត គិតចាប់តាំងពីសង្រ្គាមផ្ទុះឡើងមក៕