(សេអ៊ូល)៖ នាថ្ងៃសុក្រ ទី២៩ ខែសីហា ក្រុមរដ្ឋអាជ្ញាពិសេសនៅប្រទេសកូរ៉េខាងត្បូង បានឱ្យដឹងថា លោកស្រី Him Keon Hee ភរិយារបស់​អតីតប្រធានាធិបតី លោក Yoon Suk Yeol ត្រូវបានចោទប្រកាន់ជាផ្លូវការ ពីបទប្រព្រឹត្តអំពើពុករលួយ រួមជាមួយបទល្មើសផ្សេងៗទៀត។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

ទាំងលោកស្រី Kim និងលោក Yoon សុទ្ធតែត្រូវបានចាប់ខ្លួនរួចជាស្រេច ហើយកំពុងជាប់ឃុំឃាំងនៅក្នុងពន្ធនាគារ។ ស្វាមីលោកស្រី បាននិងកំពុងប្រឈមសវនាការជំនុំជម្រះ ជុំវិញការចោទប្រកាន់មួយចំនួន ដែលក្នុងចំណោមនោះបទចោទចម្បងបំផុត គឺការបះបោរពាក់ព័ន្ធការដាក់ប្រទេសក្រោមច្បាប់អាជ្ញាសឹក ដែលទទួលបរាជ័យកាលពីខែធ្នូ ឆ្នាំ២០២៤។ លោក Yoon ត្រូវបានដកតំណែងជាប្រធានាធិបតី កាលពីខែមេសា ឆ្នាំនេះ។

ប្តីប្រពន្ធដែលធ្លាប់មានឥទ្ធិពលធំមួយគូនេះ ប្រឈមមុខការស៉ើបអង្កេតដាច់ដោយឡែកពីគ្នា ដោយក្រុមរដ្ឋអាជ្ញាពិសេស ដែលត្រូវបានតែងតាំង ក្រោយការធ្លាក់ពីអំណាចរបស់លោក Yoon និងចាប់តាំងពីប្រធានាធិបតីថ្មី លោក Lee Jae Myung ឡើងកាន់អំណាច កាលពីខែមិថុនា។ បទចោទប្រកាន់លើលោកស្រី Kim ដែលអាចត្រូវប្រឈមនឹងការជាប់ពន្ធនាគារច្រើនឆ្នាំ ប្រសិនបើរកឃើញថាពិតជាមានទោសនោះ គឺមានចាប់តាំងពីការបោកបញ្ឆោតពាក់ព័ន្ធភាគហ៊ុន រហូតដល់ការស៊ូកប៉ាន់ ពាក់ព័ន្ធជាមួយបុគ្គលនិងតួអង្គផ្សេងៗ។

គួរបញ្ជាក់ថា លោកស្រី Kim ត្រូវបានចោមរោមដោយរឿងអាស្រូវធំៗជាច្រើន ដែលមួយចំនួនគឺផ្តើមចេញតាំងពី១៥ឆ្នាំមុនមកម្ល៉េះ ហើយរឿងអាស្រូវទាំងនោះ បានជះស្រមោលខ្មៅ ទៅលើអាណត្តិប្រធានាធិបតីរបស់ស្វាមីលោកស្រី ដោយបង្កផលប៉ះពាល់ផ្នែកនយោបាយ ទាំងចំពោះលោក Yoon ផ្ទាល់ និងចំពោះគណបក្សអភិរក្សនិយមរបស់លោក៕