(វ៉ាស៉ីនតោន)៖ សហរដ្ឋអាមេរិក កាលពីថ្ងៃព្រហស្បតិ៍ ទី២៨ ខែសីហា បានប្រកាសពីការផ្តល់ភ្លើងបៃតង ចំពោះការលក់មីស៉ីលគ្រូស ERAM ប្រភេទសម្រាប់បំពាក់លើយន្តហោះចម្បាំង សរុបចំនួន៣៣៥០គ្រាប់ រួមជាមួយគ្រឿងបរិក្ខារពាក់ព័ន្ធដទៃទៀតទៅឱ្យអ៊ុយក្រែន ក្នុងទំហំទឹកប្រាក់៨២៥លានដុល្លារ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ទីភ្នាក់ងារសហប្រតិបត្តិការសន្តិសុខការពារជាតិ DSCA នៃក្រសួងការពារជាតិអាមេរិក បាននិយាយក្នុងសេចក្តីថ្លែងការណ៍ថា ទីក្រុងកៀវនឹងទិញមីស៉ីលខាងលើ ដោយប្រើប្រាស់មូលនិធិគោលបានមកពីសម្ព័ន្ធមិត្តអឺរ៉ុប គឺដាណឺម៉ាក ហូឡង់ និងន័រវែស រួមជាមួយមូលនិធិបន្ថែម តាមរយៈកម្មវិធីហិរញ្ញប្បទានយោធាបរទេសរបស់សហរដ្ឋអាមេរិក។

គួរបញ្ជាក់ថា អ៊ុយក្រែនបានស្ថិតក្រោមការឈ្លានពានពីរុស្ស៉ី ចាប់តាំងតែពីខែកុម្ភៈ ឆ្នាំ២០២២មក ហើយមកទល់នឹងពេលនេះ ទីក្រុងមូស្គូបានបង្ហាញឆន្ទៈស្តួចស្តើងបំផុត ដើម្បីបិទបញ្ចប់សង្រ្គាមរបស់ខ្លួនវិញ បើទោះបីជាមានសម្ពាធពីអាមេរិកក៏ដោយ។ កាលពីអាណត្តិអតីតប្រធានាធិបតីអាមេរិក លោក ចូ បៃដិន ទីក្រុងវ៉ាស៉ីនតោន បានប្តេជ្ញាចំពោះការផ្តល់ជំនួយយោធា គិតជាទឹកប្រាក់ជាង​៦៥ពាន់លានដុល្លារដល់អ៊ុយក្រែន ប៉ុន្តែប្រធានាធិបតីបច្ចុប្បន្នគឺលោក ដូណាល់ ត្រាំ​ ដែលជាយូរមកហើយបានរិះគន់ការផ្តល់ជំនួយឱ្យទីក្រុងកៀវ បានរុញឱ្យអឺរ៉ុបដើរតួនាទីនាំមុខវិញ ក្នុងការផ្តល់ជំនួយយោធាដល់អ៊ុយក្រែន៕