(តៃប៉ិ)៖ សមាជិកព្រឹទ្ធសភាអាមេរិក លោក Roger Wicker ដែលជាប្រធានគណៈកម្មាធិការសេវាកម្មប្រដាប់អាវុធ និងជាអ្នកតស៊ូមតិខ្លាំងបំផុតសម្រាប់តៃវ៉ាន់នៅក្នុងសភា បានទៅដល់ទីក្រុងតៃប៉ិ នាថ្ងៃសុក្រ ទី២៩ ខែសីហា ដើម្បីពិភាក្សាអំពីសន្តិសុខជាមួយតៃវ៉ាន់។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។

លោក Wicker មកពីគណបក្សសាធារណរដ្ឋ បានឱ្យដឹងថា លោកនិងសមាជិកព្រឹទ្ធសភាម្នាក់ទៀតគឺ លោក Deb Fischer កំពុងធ្វើទស្សនកិច្ចដើម្បីពង្រឹងភាពជាដៃគូ ដែលសហរដ្ឋអាមេរិក និងតៃវ៉ាន់មានបច្ចុប្បន្ន ហើយបន្តទៅអនាគត។ លោក Fischer ក៏ជាមកពីបក្សសាធារណរដ្ឋ និងជាសមាជិកនៃគណៈកម្មាធិការសេវាកម្មប្រដាប់អាវុធផងដែរ។

នៅឯអាកាសយានដ្ឋាន Songshan ទីក្រុងតៃប៉ិ លោក Wicker គូសបញ្ជាក់ថា «យើងមកនិយាយជាមួយមិត្តភ័ក្តិ និងសម្ព័ន្ធមិត្ពីអ្វីដែលយើងកំពុងធ្វើ ដើម្បីបង្កើនសន្តិភាពទូទាំងពិភពលោក ជាប្រភេទនៃសន្តិភាពដោយពង្រឹងកម្លាំង ដូចអតីតប្រធានាធិបតីអាមេរិក Ronald Reagan ធ្លាប់លើកឡើង។ យើងឈរនៅទីនេះ ដើម្បីបញ្ជាក់ឡើងវិញនូវភាពជាដៃគូ និងកិច្ចព្រមព្រៀងសន្តិសុខមិត្តភាព ដែលសហរដ្ឋអាមេរិកមានជាមួយតៃវ៉ាន់ អស់រយៈពេលច្រើនទសវត្សរ៍មកហើយ»។

គួរបញ្ជាក់ថា នៅសប្តាហ៍ក្រោយ ព្រឹទ្ធសភាអាមេរិក នឹងពិចារណាច្បាប់ស្តីពីការចំណាយផ្នែកការពារជាតិ (NDAA) តម្លៃជិត ១ទ្រីលានដុល្លារ ដែលកំណត់គោលនយោបាយសម្រាប់មន្ទីរបញ្ចកោណ។ តាមលោក Wicker NDAA នៅឆ្នាំនេះនឹង មានការផ្តល់ឱ្យបន្ថែមទៀតដល់តៃវ៉ាន់៕