(ភ្នំពេញ)៖ អង្គភាពប្រឆាំងអំពើពុករលួយ (ACU) បានចេញសេចក្ដីប្រកាសព័ត៌មានស្ដីពីការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) សម័យប្រឡង ២៨ សីហា ២០២៥ បានដំណើរការសំណេរ រយៈពេល២ថ្ងៃនេះ បញ្ចប់ទៅដោយរលូន មានសណ្តាប់ធ្នាប់ និងវិន័យល្អ ស្របតាមគោលការណ៍ទាំង៤ របស់ក្រសួងអប់រំ យុវជន និងកីឡា ដោយឈរលើស្មារតី «អ្នកចេះ គឺជាប់ - ជាប់ដោយមោទនៈ ធ្លាក់ដោយអស់ចិត្ត» របស់រាជរដ្ឋាភិបាលនីតិកាលទី៧ នៃរដ្ឋសភា ក្រោមការដឹកនាំដ៏ឈ្លាសវៃ ប៉ិនប្រសប់ និងប្រកបដោយថាមពលដ៏ខ្លាំងក្លារបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ត្រូវបានពង្រឹង និងលើកកម្ពស់ តាមរយៈការអនុវត្តយ៉ាងម៉ឺងម៉ាត់។

ឆ្នាំ២០២៥ ជាលើកទី១២ ដែលអង្គភាពប្រឆាំងអំពើពុករលួយ (អ.ប.ព.) បានចូលរួមចំណែកជាមួយ អ.យ.ក. ក្នុងការសង្កេតការណ៍ការប្រឡងបាក់ឌុប ក្នុងនោះ អ.ប.ព. បានដាក់ពង្រាយមន្ត្រី និងមន្ត្រីនគរបាលយុត្តិធម៌ អ.ប.ព. ចំនួន៤០០នាក់ អមដោយអ្នកសង្កេតការណ៍ស្ម័គ្រចិត្តចំនួន៣,៧០០នាក់ នៅគ្រប់មណ្ឌលប្រឡងរាជធានី ខេត្ត។ អ្នកសង្កេតការណ៍ បានប្រើមធ្យោបាយធ្វើដំណើរ ធនធាន ពេលវេលាបំពេញការងារសង្កេតការណ៍ស្ម័គ្រចិត្ត ដោយខ្លួនឯង ដើម្បីចូលរួមធានាឲ្យបាននូវគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន។

ការចូលរួមសង្កេតការណ៍លើការរៀបចំ និងការប្រព្រឹត្តទៅក្នុងដំណើរការសំណេរ អ.ប.ព. សូមធ្វើការវាយតម្ល ខ្ពស់ និងសូមកោតសរសើរចំពោះកិច្ចខិតខំប្រឹងប្រែងរបស់ថ្នាក់ដឹកនាំ និងមន្ត្រីគ្រប់ជាន់ថ្នាក់នៃ អ.យ.ក. រដ្ឋបាល ថ្នាក់ក្រោមជាតិ កងកម្លាំងមានសមត្ថកិច្ច មន្ត្រីសុខាភិបាល និងភាគីពាក់ព័ន្ធទាំងអស់ដែលបានបំពេញភារកិច្ច ប្រកបដោយស្មារតីទទួលខុសត្រូវខ្ពស់ គោរពបទប្បញ្ញត្តិជាធរមាន និងមានចំណាត់ការឆ្លើយតបបានយ៉ាងទាន់ ពេលវេលាលើបាតុភាពនានាដែលបានកើតឡើង។

អ.ប.ព. ក៏សូមកោតសរសើរដោយស្មោះចំពោះស្មារតីរបស់យុវជនសហភាពសហព័ន្ធយុវជនកម្ពុជា ក្រោមការ ដឹកនាំរបស់លោក ហ៊ុន ម៉ានី ដែលបានលះបង់ពេលវេលា ក្នុងការចូលរួមគាំទ្រដល់ដំណើរការប្រឡងបាក់ឌុប សម័យប្រឡង ២៨ សីហា ២០២៥នេះ ហើយសកម្មភាពគាំទ្រនេះ បង្ហាញអំពីគម្រូដ៏ល្អ សម្រាប់យុវជនជំនាន់ក្រោយ លើការចូលរួមកិច្ចការសង្គម៕