(មូស្គូ)៖ វិមានក្រឹមឡាំងបានប្រកាសជាផ្លូវការថា ប្រធានាធិបតី វ្ល៉ាឌីមៀ ពូទីន នឹងបំពេញទស្សនកិច្ចដ៏កម្រមួយរយៈពេល ៤ថ្ងៃ ទៅកាន់ប្រទេសចិន ចាប់ពីថ្ងៃទី៣១ ខែសីហា ដើម្បីជួបលោក ស៊ី ជិនពីង ចូលរួមព្យុហយាត្រាយោធា និងកិច្ចប្រជុំកំពូល
សន្តិសុខ SCO។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters។

យោងតាមវិមានក្រឹមឡាំង លោក ពូទីន នឹងជា «ភ្ញៀវកិត្តិយសចម្បង» របស់លោក ស៊ី នៅក្នុងពិធីព្យុហយាត្រារំឭកខួបបញ្ចប់សង្គ្រាមលោកលើកទី២ នៅទីលានធានអានមេន ដោយលោកនឹងអង្គុយនៅខាងស្តាំដៃលោក ស៊ី ខណៈមេដឹកនាំកូរ៉េខាងជើង លោក គីម ជុងអ៊ុន នឹងអង្គុយនៅខាងឆ្វេង។

ក្រៅពីជំនួបកំពូលជាមួយលោក ស៊ី លោក ពូទីន ក៏នឹងចូលរួមកិច្ចប្រជុំកំពូលអង្គការសហប្រតិបត្តិការសៀងហៃ (SCO) និងមានជំនួបទ្វេភាគីជាមួយមេដឹកនាំឥណ្ឌា តួកគី និងអ៉ីរ៉ង់ផងដែរ។

គួរបញ្ជាក់ថា ទស្សនកិច្ចនេះធ្វើឡើងចំពេលដែលពាណិជ្ជកម្មរុស្ស៊ី-ចិន កំពុងធ្លាក់ចុះ ហើយលោក ពូទីន នឹងដឹកនាំគណៈប្រតិភូជាន់ខ្ពស់ ដែលរួមមានទាំងអគ្គនាយកក្រុមហ៊ុនថាមពល Gazprom ផងដែរ ដើម្បីស្វែងរកកិច្ចព្រមព្រៀងថ្មីៗ សំដៅស្តារទំហំពាណិជ្ជកម្មឡើងវិញ៕