(ភ្នំពេញ)៖ ទឹកជំនន់បានវាយប្រហារយ៉ាងធ្ងន់ធ្ងរទៅលើខេត្តមួយចំនួនរបស់ប្រទេសថៃ ដោយបានប៉ះពាល់ដល់ស្រុក-ឃុំ និងភូមិប្រជាជនយ៉ាងច្រើន។

គ្រោះធម្មជាតិនេះ ក៏បានបណ្តាលឱ្យមនុស្សមួយចំនួនស្លាប់ និងកំពុងបាត់ខ្លួន ព្រមទាំងបានបំផ្លាញផ្លូវជាតិលេខយ៉ាងធ្ងន់ធ្ងរ ដែលបានកាត់ផ្តាច់ស្រុកជាច្រើនពីការធ្វើដំណើរ។ យោងតាមរបាយការណ៍ចំណុចដែលរងការខូចខាតធ្ងន់ធ្ងរបំផុត គឺស្ពាន Huai Pong នៅលើផ្លូវជាតិលេខ ១០៨ ដែលបានបាក់ស្រុតប្រវែងជាង១០០ម៉ែត្រ។

ស្របពេលជាមួយនេះ អង្គការធុរកិច្ចឈានមុខរបស់ថៃ បានចេញមុខព្រមានពីហានិភ័យសេដ្ឋកិច្ចដែលកំពុងកើនឡើង ក្រោយសេចក្តីសម្រេចរបស់តុលាការធម្មនុញ្ញនៅថ្ងៃសុក្រ ទី២៩ ខែសីហានេះក្នុងការដកលោកស្រី ផែថងថាន ស៊ីណាវ៉ាត្រា ចេញពីតំណែងនាយករដ្ឋមន្ត្រី។ ពួកគេបានអំពាវនាវឲ្យមានកិច្ចសហប្រតិបត្តិការជាបន្ទាន់ រវាងវិស័យសាធារណៈ និងវិស័យឯកជន ដើម្បីស្តារទំនុកចិត្តវិនិយោគិនឡើងវិញ។

សហព័ន្ធឧស្សាហកម្មថៃ (FTI) បានព្រមានថា សាលក្រមនេះតំណាងឲ្យការផ្លាស់ប្តូរដ៏សំខាន់មួយនៃស្ថិរភាពនយោបាយ ដែលអាចធ្វើឲ្យអន់ថយនូវទំនុកចិត្តរបស់វិនិយោគិនទាំងក្នុង និងក្រៅប្រទេស ព្រមទាំងរំខានដល់ការរៀបចំផែនការ គោលនយោបាយសេដ្ឋកិច្ចរយៈពេលវែង។

លោក Kriengkrai Thiennukul ប្រធានសហព័ន្ធឧស្សាហកម្មថៃ បានថ្លែងយ៉ាងដូច្នេះថា «សេចក្តីសម្រេចរបស់តុលាការធម្មនុញ្ញ ក្នុងការដកនាយករដ្ឋមន្ត្រីចេញពីតំណែង គឺជាការពិតមួយដែលយើងត្រូវតែទទួលស្គាល់ថា ស្ថិរភាពនយោបាយបានផ្លាស់ប្តូរហើយ ដែលប៉ះពាល់ដល់ទំនុកចិត្តរបស់អ្នកវិនិយោគទាំងក្នុងនិងក្រៅប្រទេស និងប៉ះពាល់ដល់ការរៀបចំផែនការគោលនយោបាយសេដ្ឋកិច្ចរយៈពេលវែង»។

លោក Kriengkrai បានព្រមានទៀតថា ដំណើរអន្តរកាលរបស់រដ្ឋាភិបាលនេះ អាចនឹងបង្អាក់ការដំណើរការនៃការបែងចែក និងប្រើប្រាស់ថវិការដ្ឋដែលត្រូវបានអនុម័តសម្រាប់ឆ្នាំ ២០២៥ រួមទាំងគម្រោងវិនិយោគផ្សេងៗផងដែរ៕

នៅថ្ងៃសុក្រ ទី២៩ ខែសីហានេះ លោកស្រី Paetongtarn Shinawatra ដែលជាកូនស្រីរបស់អតីតនាយករដ្ឋមន្រ្តីថៃ លោក Thaksin Shinawatra ត្រូវបានដកហូតតំណែងនាយករដ្ឋមន្រ្តីជាផ្លូវការ ដោយតុលាការធម្មនុញ្ញនៃប្រទេសថៃ សម្រាប់ការរំលោភបំពានក្រមសីលធម៌នៃរដ្ឋធម្មនុញ្ញ បន្ទាប់ពីលោកស្រីឡើងកាន់អំណាចបានត្រឹម១ឆ្នាំ។

ឧបនាយករដ្ឋមន្រ្តី លោក Phumtham Wechayachai រួមជាមួយគណៈរដ្ឋមន្រ្តីបច្ចុប្បន្ន នឹងបន្តការដឹកនាំក្នុងនាមជារដ្ឋាភិបាលចាំផ្ទះ រហូតទាល់តែមាននាយករដ្ឋមន្រ្តីថ្មី ត្រូវបានជ្រើសរើសដោយសភានៅថ្ងៃកំណត់មួយ ដែលនឹងសម្រេចដោយប្រធានសភា។

សភាថៃ បានចេញផ្សាយសេចក្តីជូនដំណឹង និងរបៀបវារៈសម្រាប់សម័យប្រជុំសភាវិសាមញ្ញ ដែលនឹងប្រព្រឹត្តទៅចាប់ពីថ្ងៃទី៣ ដល់ថ្ងៃទី៥ ខែកញ្ញា ២០២៥ខាងមុខនេះ ដែលគេរំពឹងថា ជាកាលបរិច្ឆេទសម្រាប់ការបោះឆ្នោតជ្រើសរើសនាយករដ្ឋមន្ត្រីទី៣២ របស់ប្រទេស៕