(ឡុងដ៍)៖ ប្រព័ន្ធផ្សព្វផ្សាយក្នុងស្រុកនៅចក្រភពអង់គ្លេស បានរាយការណ៍ថា នាថ្ងៃអាទិត្យ ទី២១ ខែកញ្ញា ទីក្រុងឡុងដ៍នឹងធ្វើការទទួលស្គាល់ជាផ្លូវការ ចំពោះរដ្ឋប៉ាឡេស្ទីន ខណៈវាគឺជាការផ្លាស់ប្តូរគោលនយោបាយដ៏ធំមួយ បើទោះបីជា​មានការជំទាស់យ៉ាងដាច់អហង្ការពីអ៉ីស្រាអែល ដែលជាសម្ព័ន្ធមិត្តយូរអង្វែងរបស់ខ្លួនក៏ដោយ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

កាលពីខែកក្កដា នាយករដ្ឋមន្រ្តីអង់គ្លេស លោក Keir Starmer បាននិយាយថា ចក្រភពអង់គ្លេស នឹងទទួលស្គាល់រដ្ឋប៉ាឡេស្ទីនជាផ្លូវការ ប្រសិនបើអ៉ីស្រាអែលមិនបោះជំហានគ្រប់គ្រាន់ ដើម្បីឆ្ពោះទៅរកបទឈប់បាញ់ជាមួយក្រុមហាម៉ាស នៅត្រឹមពេលមហាសន្និបាតរបស់​អង្គការសហប្រជាជាតិ (UN) បើកកិច្ចប្រជុំនៅក្នុងខែកញ្ញានេះទេនោះ។ បណ្តាប្រព័ន្ធផ្សព្វផ្សាយក្នុងស្រុករបស់អង់គ្លេស រួមមានទាំង BBC និង Press Association បានរាយការណ៍ថា លោក Starmer នឹងប្រកាសការទទួលស្គាល់រដ្ឋប៉ាឡេស្ទីន ក្នុងថ្ងៃអាទិត្យនេះ ។

គួរបញ្ជាក់ថា ក្រៅពីអង់គ្លេស ប្រទេសប្រមាណ១០ផ្សេងទៀត រួមមានទាំងដៃគូនៅ G7 របស់អង់គ្លេស គឺបារាំង ក៏គ្រោងប្រកាស​ទទួលស្គាល់រដ្ឋប៉ាឡេស្ទីន ផងដែរ ខណៈនាយករដ្ឋមន្រ្តីអ៉ីស្រាអែល លោក Benjamin Netanyahu បានចេញមុខរិះគន់ និងបង្ហាញជំហរប្រឆាំងជាខ្លាំង៕