(ហាណូយ)៖ នាយករដ្ឋមន្រ្តី លោក Pham Minh Chinh បានឱ្យដឹងថា វៀតណាមនឹងបន្តកិច្ចចរចាពន្ធគយជាមួយសហរដ្ឋអាមេរិក ខណៈកំពុងស្វែងរកកិច្ចព្រមព្រៀងពាណិជ្ជកម្មសេរី ជាមួយទីផ្សារដទៃទៀត ដោយបន្ថែមថាប្រទេសនេះ កំណត់គោលដៅកំណើននៃការនាំចេញចំនួន ១២ភាគរយសម្រាប់ឆ្នាំ ២០២៥។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃពុធ ទី២៤ ខែកញ្ញា ឆ្នាំ ២០២៥។

តាមរយៈសេចក្តីថ្លែងការណ៍មួយ នៅលើគេហទំព័ររបស់រដ្ឋាភិបាល នាថ្ងៃពុធនេះ លោក Pham Minh Chinh និយាយថា វៀតណាម មានបំណងចុះហត្ថលេខាលើកិច្ចព្រមព្រៀងពាណិជ្ជកម្មសេរី​ ជាមួយប្លុកទីផ្សារអាមេរិកខាងត្បូង (Mercosur) និងក្រុមប្រឹក្សាសហប្រតិបត្តិការឈូងសមុទ្រ នៅក្នុងត្រីមាសទី ៤នៃឆ្នាំនេះ។ Mercosur មានសមាជិកដូចជា ប្រេស៉ីល អាហ្សង់ទីន ប៉ារ៉ាហ្កាយ និងអ៊ុយរូហ្កាយ រួមទាំងបូលីវីដែលកំពុងស្នើចូលជាសមាជិក។

សហរដ្ឋអាមេរិក ដែលជាទីផ្សារធំបំផុតរបស់វៀតណាម បានយកពន្ធ ២០ភាគរយលើទំនិញវៀតណាម ចាប់តាំងពីថ្ងៃទី ៧ ខែសីហាមក ខណៈដែលការដឹកជញ្ជូនពីប្រទេសទី ៣ ឆ្លងកាត់វៀតណាមប្រឈមនឹងពន្ធ ៤០ភាគរយ។ តាមការប៉ាន់ប្រមាណដោយកម្មវិធីអភិវឌ្ឍរបស់អង្គការសហប្រជាជាតិ ពន្ធគយអាមេរិក នាំមកនូវហានិភ័យនៃការកាត់បន្ថយ រហូតដល់មួយភាគប្រាំនៃការនាំចេញរបស់វៀតណាមទៅកាន់សហរដ្ឋអាមេរិក ដែលធ្វើឱ្យវៀតណាមក្លាយជាប្រទេសរងគ្រោះខ្លាំងជាងគេនៅក្នុងតំបន់អាស៉ីអាគ្នេយ៍៕