(មូស្គូ)៖ រុស្ស៉ី កាលពីថ្ងៃពុធ ទី២៤ ខែកញ្ញា បានប្ដេជ្ញាបន្តធ្វើប្រតិបត្តិការវាយលុករបស់ខ្លួននៅអ៊ុយក្រែន និងបានច្រានចោលការអះអាងរបស់លោកប្រធានាធិបតីអាមេរិក ដូណាល់ ត្រាំ ដែលថាកងទ័ពអ៊ុយក្រែនអាចដណ្ដើមយកទឹកដីរបស់ខ្លួនទាំងអស់ដែលកងទ័ពរុស្ស៉ីកំពុងគ្រប់គ្រងត្រឡប់មកវិញ។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

អ្នកនាំពាក្យវិមានក្រឹមឡាំង លោក Dmitry Peskov ក៏បានទាត់ចោលផងដែរការលើកឡើងរបស់លោក ត្រាំដែលចាត់ទុករុស្ស៉ីជា «ខ្លាក្រដាស»។ ការកត់សម្គាល់របស់លោក ត្រាំ ធ្វើឡើងក្រោយរូបលោកបើកកិច្ចពិភាក្សាជាមួយប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី នាឱកាសចូលរួមមហាសន្និបាតអង្គការសហប្រជាជាតិក្នុងសប្ដាហ៍នេះ។ ថ្លែងប្រាប់ AFP លោក Peskov បាននិយាយថា «តាមទស្សនៈរបស់យើង គំនិតដែលថាអ៊ុយក្រែនអាចដណ្ដើមយកទឹកដីត្រឡប់ទៅវិញជាការយល់ខុស។ ចំណែក ពាក្យខ្លាក្រដាស គឺត្រូវបានប្រើសំដៅលើសេដ្ឋកិច្ចរបស់យើង។ រុស្ស៉ីប្រៀបដូចជាខ្លាឃ្មុំ ហើយខ្លាឃុំក្រដាសគឺមិនមានទេ។ រុស្ស៉ីគឺជាខ្លាឃ្មុំពិតប្រាកដមួយ»។

តែយ៉ាងណាក៏ដោយ អ្នកនាំពាក្យវិមានក្រឹមឡាំងរូបនេះបានទទួលស្គាល់ថាសេដ្ឋកិច្ចរុស្ស៉ីមានកំណើនយឺតយ៉ាវ ក្រោយមានកំណើនយ៉ាងឆាប់រហ័សក្នុងរយៈពេល២ឆ្នាំកន្លងទៅនេះ ស្របពេលទីក្រុងវ៉ាស៊ីនតោន និងទីក្រុងកៀវ មានបំណងកាត់ផ្ដាច់ចំណូលរបស់រុស្ស៉ីដែលបានមកពីការនាំចេញថាមពល៕