(ប៉េកាំង)៖ ចិនបានឱ្យដឹងថា រដ្ឋមន្រ្តីការបរទេសកូរ៉េខាងជើង លោកស្រី Choe Son Hui នឹងមកបំពេញទស្សនកិច្ចចាប់ពីថ្ងៃសៅរ៍ ទី២៧ ខែកញ្ញា រហូតដល់ថ្ងៃអង្គារសប្តាហ៍ក្រោយ បន្ទាប់ពីមេដឹកនាំកូរ៉េខាងជើង លោក គីម ជុងអ៊ុន ទើបតែបានធ្វើដំណើរមកចូលរួម​ពិធីព្យុហយាត្រាយោធាដ៏ឱឡារិកមួយ នៅទីក្រុងប៉េកាំង កាលពីប៉ុន្មានសប្តាហ៍កន្លងទៅ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃសុក្រ ទី២៦ ខែកញ្ញា ឆ្នាំ២០២៥។

ក្រសួងការបរទេសចិន បាននិយាយក្នុងសេចក្តីថ្លែងការណ៍កាលពីថ្ងៃព្រហស្បតិ៍ដូច្នេះថា «រដ្ឋមន្រ្តីការបរទេសនៃប្រទេសកូរ៉េខាងជើង លោកស្រី Choe Son Hui នឹងមកធ្វើទស្សនកិច្ចនៅប្រទេសចិន ចាប់ពីថ្ងៃទី២៧ ដល់ថ្ងៃទី៣០ ខែកញ្ញា តបតាមការអញ្ជើញរបស់​ប្រមុខការទូតទីក្រុងប៉េកាំង លោក Wang Yi»។

គួរបញ្ជាក់ថា ក្នុងខែកញ្ញានេះ អំឡុងដំណើរទស្សនកិច្ចចេញក្រៅប្រទេសដ៏កម្រមួយ ដើម្បីចូលរួមពិធីព្យុហយាត្រាយោធានៅទីក្រុងប៉េកាំង លោក គីម បានប្រាប់ប្រធានាធិបតីចិន លោក ស៉ី ជីនពីង ថា រូបលោកមានឆន្ទៈយ៉ាងរឹងមាំ ដើម្បីបន្តអភិវឌ្ឍជាលំដាប់នូវ​ទំនាក់ទំនងទ្វេភាគី ខណៈលោក ស៉ី បានប្រាប់លោក គីម វិញថា ប្រទេសទាំងពីរ គួរតែពង្រឹងកិច្ចសហប្រតិបត្តិការ​ជុំវិញកិច្ចការអន្តរជាតិ និងរក្សាការពារផលប្រយោជន៍រួម៕