(វ៉ាស៉ីនតោន)៖ កាលពីថ្ងៃព្រហស្បតិ៍ ទី២៥ ខែកញ្ញា ប្រធានាធិបតីអាមេរិក លោក ដូណាល់ ត្រាំ បានប្រកាសពីការដំឡើងពន្ធថ្មីទៀត​លើទំនិញនាំចូលចម្រុះ ដែលនឹងចូលជាធរមាននៅសប្តាហ៍ក្រោយ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

នៅក្នុងវិធានការថ្មីខាងលើ ពន្ធគយនឹងត្រូវដំឡើងដល់១០០ភាគរយសម្រាប់ឱសថ ២៥ភាគរយសម្រាប់រថយន្តដឹកជញ្ជូនធុនធំ ៥០ភាគរយលើសម្ភារផ្ទះបាយនិងបន្ទប់ទឹក ព្រមទាំង៣០ភាគរយលើគ្រឿងសង្ហារិម ហើយចាប់ផ្តើមចូលធរមាននៅថ្ងៃទី១ ខែតុលា។ ចាប់តាំងពីឡើងកាន់អំណាចសម្រាប់អាណត្តិទី២ កាលពីដើមឆ្នាំនេះមក ការដំឡើងពន្ធគយគឺជាសកម្មភាពចម្បងបំផុតមួយរបស់លោក ត្រាំ ដោយបណ្តាប្រទេសជាដៃគូពាណិជ្ជកម្មអាមេរិក ទោះបីជាសម្ព័ន្ធមិត្តជិតស្និទ្ធក៏ដោយ គឺបានទទួលរងការដំឡើងពន្ធចន្លោះចាប់ពី១០ ដល់៥០ភាគរយ បូករួមជាមួយពន្ធកំណត់គោលដៅជាក់លាក់ដទៃទៀត លើផលិតផលចម្រុះជាច្រើន។

គួរបញ្ជាក់ថា លោក ត្រាំ បានប្រើប្រាស់វិធានការពន្ធ ជាឧបករណ៍ដ៏សំខាន់មួយសម្រាប់បម្រើនយោបាយការបរទេសរបស់អាមេរិក ដោយលោកបានប្រើប្រាស់វា ដើម្បីចរចាឡើងវិញនូវកិច្ចព្រមព្រៀងពាណិជ្ជកម្ម ទាមទារការធ្វើសម្បទាន និងដាក់សម្ពាធនយោបាយ​លើប្រទេសដទៃ។ មិនតែប៉ុណ្ណោះ រដ្ឋបាលរបស់លោក បានអះអាងថា ការដំឡើងពន្ធគយនេះ គឺប្រភពចំណូលដ៏ធំមួយ ខណៈ​រដ្ឋមន្រ្តីហិរញ្ញវត្ថុអាមេរិក លោក ​Scott Bessent បាននិយាយថា ទីក្រុងវ៉ាស៉ីនតោនអាចប្រមូលចំណូលបន្ថែមបានរហូតដល់​៣០០ពាន់លានដុល្លារ នៅត្រឹមចុងឆ្នាំនេះ៕