(ម៉ានីល)៖ អាជ្ញាធរនៅប្រទេសហ្វីលីពីន បានឱ្យដឹងថា តួលេខអ្នកស្លាប់ដោយសារការវាយប្រហាររបស់ព្យុះត្រូពិក Bualoi បានកើនដល់១១នាក់ នាថ្ងៃសៅរ៍នេះ ហើយឥឡូវព្យុះនោះ កំពុងបន្តបោកបក់សំដៅឆ្ពោះទៅរកប្រទេសវៀតណាមថែមទៀត។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ព្យុះ Bualoi បានវាយប្រហារលើបណ្តាកោះតូចៗនៅភាគកណ្តាលហ្វីលីពីន កាលពីថ្ងៃសុក្រ ដោយបណ្តាលឱ្យបាក់ដើមឈើ ដួលរលំបង្គោលអគ្គិសនី ប៉ើងដំបូងផ្ទះ ហើយបង្កការជន់លិច និងបង្ខំឱ្យមនុស្សសរុបប្រមាណ៤០០ ០០០នាក់ ត្រូវជម្លៀសខ្លួន។ ក្នុងចំណោម​កោះដែលរងគ្រោះខ្លាំងជាងគេ គឺកោះ ​Biliran ដែលមានមនុស្ស៨នាក់ស្លាប់ និង២នាកបាត់ខ្លួន។ រីឯអ្នកស្លាប់៣នាក់ផ្សេងទៀត គឺនៅកោះក្បែរខាង Masabate និង Ticao។ មនុស្សសរុប១៤នាក់ នៅបន្តបាត់ខ្លួនទូទាំងតំបន់ភាគកណ្តាលហ្វីលីពីន ហើយជាង​២០០ ០០០នាក់ កំពុងបន្តជ្រកកោននៅតាមមជ្ឈមណ្ឌលជម្លៀសខ្លួន នៅឡើយ។

គួរបញ្ជាក់ថា​ ការវាយប្រហាររបស់ព្យុះ Bualoi គឺមិនយូរប៉ុន្មាននោះទេ បន្ទាប់ពីព្យុះស៊ូភើទីហ្វុង Ragasa ដែលបានផ្តាច់ជីវិតមនុស្ស១៤នាក់ នៅភាគខាងជើងហ្វីលីពីន។ ប្រទេសនេះ ជាមធ្យមរងការវាយប្រហារពីព្យុះត្រូពិកនិង​ព្យុះទីហ្វុង​សរុបប្រហែល២០ ក្នុងមួយឆ្នាំៗ។ ដោយឡែក បន្ទាប់ពីបោកបក់លើហ្វីលីពីន នាពេលនេះ ព្យុះត្រូពិក Bualoi កំពុងឆ្ពោះទៅរក​តំបន់ភាគកណ្តាលប្រទេសវៀតណាម៕