(ហ្សាការតា)៖ នាថ្ងៃចន្ទ ទី២៩ ខែកញ្ញា វិមានប្រធានាធិបតីឥណ្ឌូណេស៉ី បានស្តារឡើងវិញនូវសិទ្ធិរាយការណ៍ព័ត៌មានរបស់​អ្នកកាសែតក្នុងស្រុកម្នាក់ ក្រោយការដកហូត បានបង្កឱ្យមានក្តីបារម្ភអំពីសេរីភាពសារព័ត៌មាន នៅក្នុងប្រទេសអាស៊ានមួយនេះ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

ការស្តារសិទ្ធិរាយការណ៍ព័ត៌មានឡើងវិញនេះ គឺបន្ទាប់ពីក្រុមប្រឹក្សាសារព័ត៌មាននៃប្រទេសឥណ្ឌូណេស៉ី កាលពីថ្ងៃអាទិត្យកន្លងទៅ បានចេញមុខអំពាវនាវឱ្យមាន ការគោរពនិងការពារសេរីភាពសារព័ត៌មាន ហើយបានទទូចឱ្យការិយាល័យរបស់ប្រធានាធិបតី លោក Prabowo Subianto ស្តារសិទ្ធិរាយការណ៍ព័ត៌មានឡើងវិញឱ្យទៅ​អ្នកកាសែតម្នាក់ ដែលត្រូវបានដកហូតសិទ្ធិ បន្ទាប់ពីបានសួរលោក Prabowo អំពីកម្មវិធីផ្តល់អាហារឥតគិតថ្លៃ ដែលពោរពេញ​ដោយបញ្ហា។ ខាងវិមានប្រធានាធិបតី ក៏បានសុំអភ័យទោសផងដែរ ហើយថែមទាំងបានសន្យាថា នឹងមិនឱ្យរឿងនេះកើតឡើងនាពេលក្រោយៗទៀតទេ។

លោកស្រី Titin Rosmasari ដែលជានិពន្ធនាយកនៃស្ថាប័នព័ត៌មានក្នុងស្រុក CNN Indonesia ដែលប្រើប្រាស់យីហោរបស់​បណ្តាញព័ត៌មានអាមេរិក CNN បានប្រាប់ Reuters នាថ្ងៃចន្ទនេះថា ការិយាល័យរបស់លោក Prabowo បានដកហូតសិទ្ធិយកព័ត៌មានរបស់លោកស្រី កាលពីយប់ថ្ងៃសៅរ៍ចុងសប្តាហ៍មុន។ បើតាមលោកស្រី Titin គឺវាទំនងជាពាក់ព័ន្ធនឹងសំណួរមួយរបស់លោកស្រី ទៅកាន់លោកប្រធានាធិបតី ស្តីពីករណីក្មេងសិស្សសាលារាប់ពាន់នាក់ ដែលបានធ្លាក់ខ្លួនឈឺ ក្រោយបរិភោគអាហារនៃកម្មវិធីផ្តល់អាហារឥតគិតថ្លៃ។

គួរបញ្ជាក់ថា ក្មេងៗសរុបជិត៦០០០នាក់ហើយ បានធ្លាក់ខ្លួនឈឺ ក្រោយហូបអាហារនៅក្រោមកម្មវិធីផ្តល់អាហារឥតគិតថ្លៃរបស់​ប្រធានាធិបតី Prabowo ដែលត្រូវបានចាប់ផ្តើមអនុវត្តកាលពីដើមឆ្នាំនេះ ខណៈជាង១០០០នាក់ ក្នុងចំណោមនោះ គឺបានឈឺ កាលពីសប្តាហ៍មុន៕