(ប៉េកាំង)៖ លោក Tang Renjian អតីតរដ្ឋមន្រ្តីកសិកម្មនិងកិច្ចការជនបទនៃប្រទេសចិន កាលពីថ្ងៃអាទិត្យ ទី២៨ ខែកញ្ញា ត្រូវបានតុលាការនៅខេត្ត Jilin ផ្តន្ទាទោសប្រហារជីវិត ដោយព្យួររយៈពេល២ឆ្នាំ ពាក់ព័ន្ធអំពើពុករលួយ។ នេះបើតាមការចេញផ្សាយដោយ ទីភ្នាក់ងារព័ត៌មាន Xinhua។

លោក Tang ត្រូវបានរកឃើញថា បានទទួលសំណូកជាប្រាក់និងទ្រព្យសម្បត្តិ មានតម្លៃសរុបលើស២៦៨លានយាន់ ឬស្មើនឹង​៣៧.៦លានដុល្លារ អំឡុងពេលកាន់តួនាទីផ្សេងៗគ្នា ចាប់ពីឆ្នាំ២០០៧ ដល់ឆ្នាំ២០២៤។ នៅប្រទេសចិន ការកាត់ទោសប្រហារជីវិត​ ប៉ុន្តែដោយមានការព្យួរបែបនេះ គឺជាទូទៅក្រោយរយៈពេលព្យួរ ទោសនោះនឹងត្រូវប្តូរមកជា ទោសជាប់ពន្ធធនាគារអស់មួយជីវិតវិញ។

គណបក្សកុម្មុយនិស្តចិន បានបណ្តេញលោក Tang ចេញពីបក្សកាលពីខែវិច្ឆិកា ឆ្នាំ២០២៤ ពោលគឺ៦ខែបន្ទាប់ពីលោកត្រូវបានដាក់ឱ្យ​ស្ថិតក្រោមការស៉ើបអង្កេត របស់អាជ្ញាធរប្រយុទ្ធប្រឆាំងអំពើពុករលួយ និងដកហូតមុខតំណែង។ លោក Tang ធ្លាប់បម្រើតួនាទីជា​អភិបាលខេត្ត Gansu ចាប់ពីឆ្នាំ២០១៧ ដល់ឆ្នាំ២០២០ មុនពេលត្រូវបានតែងតាំងជារដ្ឋមន្រ្តីកសិកម្មនិងកិច្ចការជនបទ។

គួរបញ្ជាក់ថា កាលពីខែមករា ដើមឆ្នាំនេះ ប្រធានាធិបតីចិន លោក ស៉ី ជីនពីង បានសង្កត់ធ្ងន់ថា អំពើពុករលួយ គឺជាការគំរាមកំហែងធំបំផុត សម្រាប់គណបក្សកុម្មុយនិស្តចិន ហើយនៅតែកំពុងបន្តកើនឡើង៕