(ហាណូយ)៖ នាថ្ងៃពុធ ទី១ ខែតុលា រដ្ឋាភិបាលវៀតណាម បានចេញរបាយការណ៍វាយតម្លៃជាបឋមថា ការខូចខាតទ្រព្យសម្បត្តិ បង្កឡើងដោយសារការវាយប្រហាររបស់ព្យុះទីហ្វុង Bualoi គឺគិតជាទឹកប្រាក់ស្មើនឹងខ្ទង់៨ទ្រីលានដុង ឬ៣០៣លានដុល្លារអាមេរិក។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

ព្យុះ Bualoi ដែលជាព្យុះទីហ្វុងមានឥទ្ធិពលដ៏ខ្លាំងមួយ បានមកដល់តំបន់ភាគកណ្តាលប្រទេសវៀតណាម កាលពីថ្ងៃចន្ទសប្តាហ៍នេះ ហើយវាបាននាំមកជាមួយនូវខ្យល់បោកបក់ និងភ្លៀងធ្លាក់យ៉ាងខ្លាំងក្លា ដែលបានផ្តាច់ជីវិតមនុស្សយ៉ាងហោច២៩នាក់ និងបន្សល់ទុក​២២នាក់ផ្សេងទៀតបាត់ខ្លួន។

គួរបញ្ជាក់ថា ការមកដល់នៃព្យុះ Bualoi នៅវៀតណាម គឺបន្ទាប់ពីព្យុះទីហ្វុងនេះ បានវាយប្រហារលើហ្វីលីពីនកាលពីសប្តាហ៍មុន និងសម្លាប់មនុស្ស២៧នាក់៕