(គៀវ)៖ មន្ត្រីអ៊ុយក្រែនបានឱ្យដឹងនៅថ្ងៃសុក្រថា ការវាយប្រហារតាមផ្លូវអាកាសដ៏ធំរបស់រុស្ស៊ី បានវាយប្រហារលើទីតាំងផលិតឧស្ម័នសំខាន់ៗមួយចំនួនរបស់អ៊ុយក្រែន ដោយក្នុងករណីខ្លះបណ្តាលឱ្យមានការខូចខាតយ៉ាងធ្ងន់ធ្ងរ ខណៈដែលអ៊ុយក្រែនកំពុងត្រៀមខ្លួនសម្រាប់រដូវរងាថ្មី។ នេះបើតាមការផ្សាយ ដោយទីភ្នាក់ងារសារព័ត៌មាន Reuters។

នាយកប្រតិបត្តិក្រុមហ៊ុនឧស្ម័ន និងប្រេងរដ្ឋ Naftogaz លោក Sergii Koretskyi បានឱ្យដឹងថា រុស្ស៊ីបានបាញ់មីស៊ីល ៣៥គ្រាប់ និងដ្រូន ៦០គ្រឿង ទៅលើទីតាំងរបស់ក្រុមហ៊ុននៅក្នុងតំបន់ Kharkiv និង Poltava ពេញមួយយប់ ដោយលោកបានបន្ថែមថា ការវាយប្រហារនេះគឺធំជាងគេបំផុតក្នុងសង្គ្រាមលើទីតាំងរបស់ក្រុមហ៊ុន។ លោកបានបន្ថែមនៅលើ Facebook ថា «ជាលទ្ធផលនៃការវាយប្រហារនេះ ផ្នែកសំខាន់នៃទីតាំងរបស់យើងត្រូវខូចខាត។ ការបំផ្លិចបំផ្លាញមួយចំនួនគឺធ្ងន់ធ្ងរណាស់»។

ក្រសួងការពារជាតិរុស្ស៊ីបានបញ្ជាក់ថា កងកម្លាំងរបស់ខ្លួនបានធ្វើការវាយប្រហារទ្រង់ទ្រាយធំពេញមួយយប់លើហេដ្ឋារចនាសម្ព័ន្ធឧស្ម័ន និងថាមពលរបស់អ៊ុយក្រែន ដោយបន្ថែមថា ខ្លួនក៏បានវាយប្រហារលើទីតាំងឧស្សាហកម្មយោធាផងដែរ។

គួរបញ្ជាក់ថា ការវាយប្រហាររបស់រុស្ស៊ីលើហេដ្ឋារចនាសម្ព័ន្ធឧស្ម័នរបស់អ៊ុយក្រែនកាលពីដើមឆ្នាំនេះ បានកាត់បន្ថយផលិតកម្មក្នុងស្រុក ៤០%។ ដោយសារការព្រួយបារម្ភអំពីការរំខានការផ្គត់ផ្គង់ក្នុងស្រុក អ៊ុយក្រែនបានបង្កើនការនាំចូលឧស្ម័ន និងមានគោលដៅស្តុកទុកឧស្ម័ន ១៣.២ ពាន់លានម៉ែត្រគូបនៅក្នុងឃ្លាំងស្តុកនៅពាក់កណ្តាលខែតុលា៕