បារាំងជំរុញការប្រើប្រាស់កម្មវិធីផ្ញើសាររបស់ប្រទេសខ្លួន ក្រោយពីហាមឃាត់ WhatsApp និង Telegram សម្រាប់មន្ត្រីរាជការ (Video inside)
04-10-2025 10:18
(បរទេស)៖ ស្របពេលដែលប្រទេសបារាំងបានដាក់បម្រាមលើការប្រើប្រាស់កម្មវិធី WhatsApp និង Telegram សម្រាប់កិច្ចការផ្លូវការរបស់មន្ត្រីរាជការ ដោយតម្រូវឱ្យពួកគេងាកទៅប្រើប្រាស់កម្មវិធីផ្ញើសារជាតិ Tchap វិញនោះ ករណីនេះបានក្លាយជាមេរៀនសំខាន់មួយសម្រាប់បណ្ដាប្រទេសនានា ជាពិសេសក្នុងការការពារសន្តិសុខទិន្នន័យ និងជំរុញឯករាជ្យភាពបច្ចេកវិទ្យា។
តើអ្វីជាសារៈសំខាន់នៃកម្មវិធីផ្ញើសារជាតិ? គោលបំណងចម្បងក្នុងការជំរុញនេះ គឺផ្អែកលើមូលហេតុសំខាន់ៗដូចជា ទី១៖ សុវត្ថិភាពទិន្នន័យនិងការទំនាក់ទំនងផ្លូវការ៖ ធានាថា រាល់ការឆ្លើយឆ្លងផ្លូវការរបស់រដ្ឋាភិបាល ជាពិសេសព័ត៌មានរសើប ត្រូវបានរក្សាទុកនៅលើ ម៉ាស៊ីនមេក្នុងស្រុក (local servers) ដែលស្ថិតក្រោមការគ្រប់គ្រងពេញលេញរបស់ស្ថាប័នជាតិ។ នេះនឹងកាត់បន្ថយហានិភ័យនៃការលួចចូលប្រើប្រាស់ទិន្នន័យដោយបរទេស ឬការចារកម្មតាមអ៊ីនធឺណិត ដែលជាក្ដីបារម្ភធំដូចករណីបារាំងដែរ។ ទី២ អធិបតេយ្យភាពបច្ចេកវិទ្យា៖ ការគាំទ្រកម្មវិធីជាតិមិនត្រឹមតែពង្រឹងសមត្ថភាពផ្នែកឌីជីថលរបស់កម្ពុជាប៉ុណ្ណោះទេ ប៉ុន្តែក៏ជាផ្នែកមួយនៃកិច្ចខិតខំប្រឹងប្រែងដើម្បីសម្រេចបាននូវ ឯករាជ្យភាពឌីជីថល និងកាត់បន្ថយការពឹងផ្អែកលើវេទិកាបរទេស និងទី៣គឺ ការអនុលោមតាមច្បាប់៖ កម្មវិធីជាតិអាចធានាបាននូវការអនុលោមតាមច្បាប់ និងបទប្បញ្ញត្តិស្តីពីការការពារទិន្នន័យផ្ទាល់ខ្លួនរបស់កម្ពុជាបានយ៉ាងពេញលេញ។
សរុបមក ការលើកកម្ពស់ការប្រើប្រាស់កម្មវិធីផ្ញើសារជាតិចំពោះមន្ត្រីរាជការ គឺជាជំហានចាំបាច់មួយដើម្បីធានាដល់សន្តិសុខប្រព័ន្ធព័ត៌មាន និងការពារផលប្រយោជន៍ជាតិនៅលើវិស័យឌីជីថល។ រដ្ឋាភិបាលបានអំពាវនាវឱ្យមន្ត្រីទាំងអស់ផ្លាស់ប្តូរទម្លាប់ប្រើប្រាស់ និងចាប់យកបច្ចេកវិទ្យាក្នុងស្រុកដើម្បីរួមចំណែកក្នុងការកសាងសង្គមឌីជីថលដែលមានសុវត្ថិភាព និងភាពរឹងមាំ៕
