(កៀវ)៖ នៅថ្ងៃសៅរ៍ ទី៤ ខែតុលានេះ ក្រុមមន្ត្រីអ៊ុយក្រែន បានឱ្យដឹងថា យន្តហោះដ្រូនរបស់រុស្ស៉ីបានវាយប្រហាររថភ្លើងដឹកអ្នកដំណើរនៅស្ថានីយ៍មួយ ក្នុងតំបន់ Sumy ភាគខាងជើងនៃប្រទេស បណ្តាលឱ្យមនុស្សជាច្រេីននាក់រងរបួស។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters។

ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី និយាយថា ការវាយប្រហារដោយដ្រូនយ៉ាងព្រៃផ្សៃរបស់រុស្ស៉ី ទៅលើស្ថានីយ៍រថភ្លើងក្នុងទីក្រុង Shostka នៃតំបន់ Sumy បណ្តាលឱ្យឆេះទូរថភ្លេីងដែលមានអ្នកដំណើរនៅលេីនោះ។

អភិបាលតំបន់ Sumy លោក Oleh Hryhorov និយាយថា រថភ្លើងនេះធ្វើដំណើរពីទីក្រុង Shostka ទៅកាន់រដ្ឋធានីកៀវ។​ គ្រូពេទ្យ និងក្រុមសង្គ្រោះកំពុងធ្វើការនៅកន្លែងកើតហេតុ។ បេីតាមប្រធានរដ្ឋបាលស្រុក មនុស្សប្រហែល ៣០នាក់បានរងរបួសនៅក្នុងការវាយប្រហារនោះ។

គួរបញ្ជាក់ថា រុស្ស៉ី បានបង្កើនការវាយប្រហារតាមផ្លូវអាកាស ទៅលើហេដ្ឋារចនាសម្ព័ន្ធផ្លូវដែករបស់អ៊ុយក្រែន ដោយស្ទើរតែជារៀងរាល់ថ្ងៃក្នុងរយៈពេលពីរខែចុងក្រោយនេះ៕